ՖԻՖԱ-ի նախագահ Ջաննի Ինֆանտինոն մեղադրել է աշխարհի առաջնության քննադատներին՝ մրցաշարի վերաբերյալ ատելություն և կեղծ տեղեկություններ տարածելու մեջ։ Բաց նամակում նա հայտարարել է, որ առաջնությունը հաջողված է եղել, և այն անցկացվել է միասնության, անվտանգության ու ներառականության պայմաններում։
Ինֆանտինոյի խոսքով՝ քննադատները չեն նկատել միլիոնավոր երկրպագուների դրական զգացողությունները։ «Դուք այնքան կենտրոնացած էիք ատելության և քննադատության վրա, որ բաց թողեցիք այդ ամենը»,- գրել է նա։ ՖԻՖԱ-ի նախագահը նշել է, որ կազմակերպությունը կենտրոնացած է եղել մրցաշարի կազմակերպման և անվտանգության ապահովման վրա՝ ընդգծելով, որ առաջնության ընթացքում չեն եղել բռնության դեպքեր կամ լուրջ միջադեպեր։
Աշխարհի առաջնության ընթացքում ՖԻՖԱ-ն քննադատության էր ենթարկվել ԱՄՆ մուտքի սահմանափակումների, հակամարտությունների մեջ գտնվող երկրների հավաքականների մասնակցության և մի շարք այլ հարցերի պատճառով։ Ինֆանտինոն անդրադարձել է նաև մրցավարական որոշումներին՝ նշելով, որ սխալ քարտերը կամ որոշ խաղացողների չորակազրկելը ֆուտբոլում սովորական երևույթներ են։
Նա նաև հայտնել է, որ Իրանի հավաքականը ստացել է ԱՄՆ մուտքի արտոնագրեր՝ չնայած երկու երկրների միջև լարված հարաբերություններին։ «Ֆուտբոլը խաղաղության մասին է, այն քաղաքականության մասին չէ»,- հայտարարել է ՖԻՖԱ-ի նախագահը։