Ուկրաինայի նախագահ Վոլոդիմիր Զելենսկին հայտարարել է, որ, իր կարծիքով, ԱՄՆ նախագահ Դոնալդ Թրամփը հասկացել է՝ պատերազմի ավարտով շահագրգռված չէ ոչ թե Ուկրաինան, այլ Ռուսաստանը։ Զելենսկին նշել է, որ Ուկրաինան ձգտում է կանգնեցնել ռուսական ագրեսիան և հասնել արդար խաղաղության՝ ընդգծելով, որ երկրի գլխավոր առաջնահերթությունը մարդկային կյանքերի պահպանումն է։
«Եթե պատերազմը հնարավոր լինի դադարեցնել արդեն վաղը և հասնել հրադադարի, դա շատ ավելի լավ կլինի, քան ևս 10-20 տարի տևող մարտական գործողություններն ու նոր զոհերը»,- ասել է նա՝ հավելելով, որ հրադադարը Կիևի համար ավելի նախընտրելի է, քան երկարատև պատերազմը։
Զելենսկին նաև հայտարարել է, որ պատրաստ է խաղաղության համաձայնագիր ստորագրել Ռուսաստանի հետ «Օվալաձև աշխատասենյակում կամ Մար-ա-Լագոյում»՝ նշելով, որ ամեն ինչ կախված է Թրամփից։
Նրա խոսքով՝ այժմ արդեն բոլորի համար պարզ է, որ հենց Ռուսաստանը շահագրգռված չէ պատերազմի դադարեցմամբ։ Զելենսկին նաև կարծիք է հայտնել, որ Թրամփը սկսել է իրեն վստահել, և դա դարձել է Ուկրաինայի նկատմամբ նրա հռետորաբանության փոփոխության հիմնական պատճառը։
Ուկրաինայի նախագահը նաև հայտարարել է, որ Խորհրդային Միության վերականգնումը սպառնալիք կլինի ոչ միայն Եվրոպայի, այլև ԱՄՆ-ի համար։ Նրա խոսքով՝ Վլադիմիր Պուտինի ռազմավարական նպատակը նախկին ԽՍՀՄ տարածքների և ազդեցության վերականգնումն է, իսկ Ուկրաինան այդ ծրագրերի գլխավոր խոչընդոտն է։
Զելենսկին հավելել է, որ ԽՍՀՄ վերականգնման դեպքում աշխարհը կստանա Չինաստանի և Խորհրդային Միության դաշինք՝ «ամենամեծ կայսրությամբ և ամենամեծ բանակով», որոնք, նրա գնահատմամբ, կարող են գերազանցել ԱՄՆ-ին և վտանգ ներկայացնել նրա համար։
Նա շնորհակալություն է հայտնել Միացյալ Նահանգներին աջակցության համար՝ նշելով, որ դրա շնորհիվ Ռուսաստանին չի հաջողվել վերականգնել Խորհրդային Միությունը։