Լիտվայի գլխավոր դատախազությունը հայտնել է, որ երկրի քաղաքացի է ձերբակալվել՝ Ռուսաստանի օգտին լրտեսական գործունեություն իրականացնելու կասկածանքով։
Գերատեսչության հաղորդագրության համաձայն՝ հարուցվել է նախաքննություն, իսկ կասկածյալը կալանավորվել է։
Լիտվայի հատուկ ծառայությունների տվյալներով՝ նա հավաքել և ռուսական կողմին է փոխանցել տեղեկություններ ռազմական օբյեկտների, ռազմական տեխնիկայի և դրա տեղաշարժի վերաբերյալ։
Լիտվայի օրենսդրությամբ լրտեսության համար նախատեսված է 6-ից 15 տարվա ազատազրկում։
Վերջին տարիներին ԵՄ մի շարք երկրներ պարբերաբար մեղադրում են Ռուսաստանին իրենց տարածքում տարբեր միջադեպերի և անօրինական գործունեության մեջ։ Իր հերթին, Կրեմլի խոսնակ Դմիտրի Պեսկովը նախկինում հայտարարել էր, որ Արևմուտքում «ամեն ինչում Ռուսաստանին մեղադրելու միտում կա»՝ այդ մոտեցումը բնութագրելով որպես «ընդհանուր հիվանդություն»։