Բարձրագույն դատական խորհուրդը (ԲԴԽ) հայտարարել է դատավորների թեկնածուների ցուցակի քրեական մասնագիտացման բաժնի համալրման նպատակով որակավորման ստուգում անցկացնելու մասին։ Համապատասխան որոշումն ընդունվել է 2026 թվականի հուլիսի 21-ին, երբ ԲԴԽ-ն արձանագրել է, որ անհրաժեշտ է համալրել դատավորների թեկնածուների ցուցակի քրեական մասնագիտացման բաժինը՝ առանց համալրման ենթակա տեղերի քանակի սահմանափակման։
Որակավորման ստուգմանը կարող են մասնակցել 25-60 տարեկան, ընտրական իրավունք ունեցող անձինք, որոնք`
- ունեն միայն Հայաստանի Հանրապետության քաղաքացիություն,
- ունեն համապատասխան իրավաբանական բարձրագույն կրթություն,
- տիրապետում են հայերենին,
- ունեն անգլերեն, ռուսերեն կամ ֆրանսերեն լեզուներից առնվազն մեկի՝ ԲԴԽ-ի սահմանած մակարդակի իմացություն,
- ունեն օրենքով պահանջվող մասնագիտական աշխատանքային փորձ,
- չունեն «ՀՀ դատական օրենսգիրք» սահմանադրական օրենքով նախատեսված դատավոր նշանակվելու խոչընդոտներ։
Հավակնորդները Դատական դեպարտամենտ պետք է ներկայացնեն ԲԴԽ-ի սահմանած ձևի հայտը և օրենքով նախատեսված փաստաթղթերի ամբողջ փաթեթը։
Հայտին կից ներկայացվում են`
- անձը հաստատող փաստաթղթի, նույնականացման քարտի պատճենները և էլեկտրոնային փոստի հասցեն (ներկայացնել նաև փաստաթղթի բնօրինակը,
- հինգ գունավոր լուսանկար /3 x 4 չափսի/,
- հավակնորդի կենսագրական տվյալները պարունակող քարտ,
- նոտարական կարգով հաստատված բանավոր հայտարարություն դիմողի դատվածության և սնանկության կամ դրանց բացակայության մասին,
- իրավաբանական կրթության՝ պահանջվող որակավորման աստիճանի առկայությունը հավաստող փաստաթղթի պատճեն/պատճենները (ներկայացնել նաև փաստաթղթի բնօրինակը),
- հայերենին տիրապետելու հանգամանքը հավաստող փաստաթղթի պատճեն (ներկայացնել նաև փաստաթղթի բնօրինակը),
- պահանջվող օտար լեզուների՝ Բարձրագույն դատական խորհրդի սահմանած համապատասխան մակարդակին տիրապետելու հանգամանքը հավաստող փաստաթուղթ (թիվ ԲԴԽ-39-Ո-92 որոշում, թիվ ԲԴԽ-25-Ո-57 փոփ. որոշում), բացառությամբ, եթե հավակնորդը Բարձրագույն դատական խորհրդի սահմանած ձևի հայտ ներկայացնելու պահին ունի միայն ռուսաց լեզվի ստանդարտացված թեստային համակարգերով ստուգվող լեզվական գիտելիքի իմացություն, ապա պարտավորվում է մինչև Արդարադատության ակադեմիայում ուսուցման ավարտը ներկայացնել Օրենքի 97-րդ հոդվածի 1-ին մասի 4-րդ կետում նշված այլ լեզվի իմացության վերաբերյալ համապատասխան ապացույցը, հակառակ դեպքում նա չի ներառվում դատավորների թեկնածուների ցուցակում,
- պահանջվող մասնագիտական աշխատանքի փորձառությունը հավաստող ապացույց, այդ թվում՝ աշխատանքային պարտականությունները հավաստող պաշտոնի անձնագիր կամ այլ փաստաթղթեր,
- արական սեռի հավակնորդի դեպքում՝ պարտադիր զինվորական ծառայություն անցած լինելու հանգամանքը հավաստող կամ այլընտրանքային ծառայություն անցած լինելու կամ պարտադիր զինվորական ծառայությունից ազատված լինելու փաստը հավաստող փաստաթղթի պատճեն (ներկայացնել նաև փաստաթղթի բնօրինակը),
- դատավորի պաշտոնում նշանակմանը խոչընդոտող ֆիզիկական արատների և հիվանդությունների բացակայության մասին Կառավարության սահմանած կարգով տրված փաստաթուղթ (Կառավարության 30.05.2019թ. թիվ 685-Ն որոշում),
- Բարձրագույն դատական խորհրդի սահմանած ձևով համաձայնություն (թիվ ԲԴԽ-19-Ո-40 որոշում)՝ իր վերաբերյալ պետական մարմիններից և պաշտոնատար անձանցից, հավակնորդին ներկայացվող պահանջների համապատասխանության ստուգման սահմաններում, անհրաժեշտ անձնական տվյալներ, այդ թվում` բժշկական գաղտնիք հանդիսացող և այլ տեղեկություններ ստանալու մասին,
- առավելագույնը երեք երաշխավորագիր-նամակ՝ ըստ հավակնորդի ցանկության,
- օրենքով սահմանված չափով պետական տուրքի վճարման անդորրագիր,
- բարեվարքության վերաբերյալ հարցաթերթիկ http://cpcarmenia.am/hy/news/item/2024/07/26/1/,
- գրավոր հայտարարություն հայտում առկա տեղեկությունների և կից ներկայացված փաստաթղթերի հավաստիության մասին,
- միայն ՀՀ քաղաքացի հանդիսանալու վերաբերյալ փաստաթուղթ:
Իրավագիտության բնագավառում գիտական աստիճան ունեցող հավակնորդը հայտին՝ ի թիվս Օրենքով սահմանված մյուս փաստաթղթերի, կցում է նաև գիտական աստիճանի առկայությունը հավաստող փաստաթուղթը, գիտական աշխատությունների և հրապարակումների ցանկը:
Փաստաթղթերի ընդունման վերջնաժամկետը 2026 թվականի օգոստոսի 24-ն է։ Դրանք ընդունվում են յուրաքանչյուր աշխատանքային օր՝ մինչև ժամը 17:30-ը, Դատական դեպարտամենտում (ք. Երևան, Կորյունի 17)։
ԲԴԽ-ն տեղեկացնում է, որ որակավորման գրավոր քննության անցկացման ժամանակի, վայրի և առաջադրանքների առնվազն մեկ նմուշի վերաբերյալ հայտարարությունը կհրապարակվի դատական իշխանության պաշտոնական www.court.am կայքում և հրապարակային ծանուցումների պաշտոնական ինտերնետային հարթակում՝ քննության օրվանից առնվազն 10 օր առաջ։
Հիշեցում՝
«Պետական տուրքի մասին» ՀՀ օրենքի 20-րդ հոդվածի 38.1 կետով սահմանված պետական տուրքի վճարումը կատարել հետևյալ հաշվեհամարին՝
Հ/Հ՝ 900005163671
Բանկ՝ ՀՀ Ֆինանսների նախարարության գործառնական վարչություն.
Ստացող՝ ՀՀ պետական բյուջե.
Նպատակը՝ «Դատավորների թեկնածուների ցուցակի քրեական մասնագիտացման բաժնի համալրման որակավորման ստուգման համար»: