Իրանը չի հրաժարվում Միացյալ Նահանգների հետ առկա խնդիրները դիվանագիտական ճանապարհով լուծելու հնարավորությունից։ Այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային։
«Երկրի շահերը ապահովելու համար, անհրաժեշտության դեպքում, մենք կօգտագործենք ռազմական միջոցներ, կօգտագործենք նաև դիվանագիտություն»,- ասել է Բաղային։
Նրա խոսքով՝ Թեհրանը շարունակում է ԱՄՆ-ի հետ կապ պահպանել միջնորդների միջոցով։ Բաղային նշել է, որ վերջին օրերին Իրանը շփումներ է ունեցել Կատարի, Օմանի և Պակիստանի ներկայացուցիչների հետ, և այդ գործընթացը շարունակվում է։
Իրանի ԱԳՆ խոսնակի խոսքով՝ միջնորդների հիմնական նպատակը Իրանի և Միացյալ Նահանգների միջև լարվածության հետագա սրումը կանխելն է։