Ադրբեջանը կարող է դուրս գալ Եվրոպայի խորհրդից. այս մասին հայտարարել է նախագահ Իլհամ Ալիևը։
«Խոսքը անդամակցությունը կասեցնելու կամ սառեցնելու մասին չէ. մենք միանշանակորեն դիտարկում ենք կազմակերպությունից լիովին դուրս գալու հնարավորությունը», – ասել է Ալիևը բռնազավթված Շուշիի գլոբալ մեդիաֆորումի բացմանը։
Նրա խոսքով՝ Եվրոպայի խորհրդի գլխավոր քարտուղար Ալեն Բերսեն «խնդրել է իրենց չանել դա, այլ ուղիներ փնտրել իրավիճակը բարելավելու համար»։
Ալիևը կարծում է, որ Ադրբեջանը երկու տարի շարունակ Եվրոպայի խորհրդում «ենթարկվում է խտրականության և կողմնակալ վերաբերմունքի», և որ ԵՄ-ի բողոքները Բաքվի դեմ «անհիմն» են։
Հունիսի վերջին Եվրոպայի խորհրդի խորհրդարանական վեհաժողովը լիագումար նիստի ժամանակ մտահոգություն հայտնեց Ադրբեջանում քննադատության ճնշման և քաղբանտարկյալների թվի զգալի աճի վերաբերյալ։
ԵԽԽՎ-ն հայտարարել է, որ վերջին տարիներին ընդունված օրենքները հանգեցրել են «անկախ լրագրության, իրական քաղաքական ընդդիմության, քաղաքացիական խոսքի ազատության ճնշմանը»։
Իր ելույթում Իլհամ Ալիևը նաև նշել է, որ Բաքուն լիովին կարգավորել է հարաբերությունները Մոսկվայի հետ։ Հարաբերությունները կտրուկ վատթարացել էին 2024 թվականի դեկտեմբերի վերջին «Ադրբեջանական ավիաուղիներ» ընկերության ինքնաթիռի վթարից հետո։