Հասարակական գործիչ Կարեն Հեքիմյանի ֆեյսբուքյան գրառումը. «Փաշինյան Նիկոլը շարունակում է հիանալ Ադրբեջանով: Այս անգամ վերջինիս հիացմունքի առիթն Արծվաշենի հանդեպ Ադրբեջանի «վերաբերմունքն» է»:
Ուրեմն, Փաշինյան Նիկոլը ««մեկ-մեկուկես ամիս առաջ» տեղեկացել է, որ Ադրբեջանի դրամի և անձնագրի քարտեզների մեջ Արծվաշենը որպես անկլավ արձանագրված է»: Փաշինյանը հիանում է՝ «սա շատ կարևոր նրբություն է, և կարծում եմ, որ մենք էլ պետք է հայելային նույն մոտեցումը ցուցաբերենք»: Այսինքն, ըստ Փաշինյան Նիկոլի, Հայաստանը «հետ է մնացել» Ադրբեջանից և այսուհետ հայկական դրամի և քարտեզների վրա կարտացոլվեն «ադրբեջանական անկլավները»՝ Քյարքին, Սոֆուլու|Բարխուդարլուն և Յուխարի Ասքիփարան:
Նախ՝ կարծում եմ, որ Փաշինյան Նիկոլը ոչ միայն նոր է իմացել ադրբեջանական մանաթի վրա պատկերված քարտեզի բովանդակության, այլև նոր է տեղեկացել Արծվաշենի՝ ՀՀ միջազգանորեն ճանաչված և անբաժանելի մաս լինելու մասին:
Խնդիրն այն է, որ տասնյակ տարիներ շարունակ Արծվաշենի ճակատագրով մտահոգված անձինք հարյուրավոր հրապարակային ելույթներում և հոդվածներում օրինակ էին բերում ոչ միայն ադրբեջանական մանաթի, այլև Ադրբեջանի պետական կառույցների, հեռուստաընկերությունների ներկայացված քարտեզները և դրանք համեմատում էին Հայաստանում հրապարակվող քարտեզների հետ:
Միայն զարմանք է առաջացնում այն փաստը, որ Փաշինյան Նիկոլն ութ տարի ղեկավարում է մի պետություն, որի մի հատված օկուպացված է Ադրբեջանի կողմից, և նա այդ մասին տեղեկությունները սկսել է հավաքագրել մեկ-մեկուկես ամիս առաջ:
Վստահ եմ՝ այս պատմության մեջ Փաշինյան Նիկոլին ոգևորում է բացառապես այն, որ այսուհետ Հայաստանում թողարկվող քարտեզներում Քյարքին, Սոֆուլու/Բարխուդարլուն և Յուխարի Ասքիփարան ներկայացվեն որպես ադրբեջանական տարածքներ:
Վստահ եմ՝ Փաշինյան Նիկոլը մինչ օրս չգիտի (ենթադրաբար՝ չի ցանկանում իմանալ), որ մինչ օրս Հայաստանում ներկայացված բազմաթիվ քարտեզներում (պատրաստ եմ ցուցակ ներկայացնել) Արծվաշենը ներկայացված չէ: Սակայն, ինչպես հասկացաք, դա կարևոր չէ: Կարևորը՝ Ալիև Իլհամն է և Քյարքին, Սոֆուլու/Բարխուդարլուն ու Յուխարի Ասքիփարան»: