Մեծ Բրիտանիայի թագավոր Չարլզ III-ը ներում է շնորհել Ռութ Էլիսին՝ Միացյալ Թագավորությունում ավելի քան 70 տարի առաջ մահապատժի ենթարկված վերջին կնոջը։ Այս մասին հայտարարվել է կառավարության կայքում։
Չարլզ III-ի՝ Էլիսին պայմանական ներում շնորհելու որոշումը նրա մահապատիժը փոխարինում է ցմահ բանտարկությամբ և ընդունում է, որ ժամանակակից բրիտանական իրավական շրջանակների համաձայն՝ «արդյունքը կարող էր այլ լինել»։
Ռութ Էլիսը 1955 թվականին դատապարտվել է կախաղան հանելու միջոցով՝ իր ամուսնու՝ Դեյվիդ Բեյքլիի սպանության համար։ Այդ ժամանակ որևէ բողոքարկում չի ներկայացվել։
«Այսօրվա պայմանական ներումը ողորմածության դրսևորում է։ Մենք հույս ունենք, որ այն որոշակի մխիթարություն կբերի Ռութի ընտանիքին։ Մենք չենք կարող փոխել այն, ինչ տեղի է ունեցել 70 տարի առաջ։ Բայց մենք կարող ենք ընդունել, որ սա բացառիկ դեպք էր», – ասել է Մեծ Բրիտանիայի արդարադատության նախարար Դեյվիդ Լամմին։
Նշվում է, որ ներման միջնորդությունը ներկայացրել են Էլիսի չորս թոռները, որոնք կարծում են, որ հանցագործության դրդապատճառները եղել են ընտանեկան բռնությունը, ամուսնու կողմից իրեն հասցված վնասվածքները և այլ հանգամանքներ, որոնք հաշվի չեն առնվել դատավարության ընթացքում:
Մեծ Բրիտանիայի գործող օրենսդրության համաձայն՝ Էլիսը կարող էր պնդել, որ նրա գործունակությունը նվազել է, ինչը կհանգեցներ նրան, որ նրա դատապարտումը կդիտարկվեր որպես մարդասպանություն, նշվում է հայտարարության մեջ: