Գերմանիացի գիտնականները ստեղծել են փորձարարական մարսագնաց, որը կարողանում է շատ ավելի արդյունավետ տեղաշարժվել ավազի վրա՝ ոգեշնչվելով Սահարայի անապատում բնակվող «ավազաձուկ» մողեսից (Scincus scincus)։ Այս փոքրիկ սողունը վտանգի դեպքում սուզվում է ավազի տակ և «լողում» դրա միջով՝ հեշտությամբ շարժվելով նույնիսկ ամենափխրուն ավազի մեջ։ Մարսի վրա տեղաշարժվելը վաղուց լուրջ խնդիր է ռովերների համար։ Փխրուն ավազը հաճախ ստիպում է անիվներին սահել, խրվել կամ ամբողջությամբ կանգ առնել, ինչն արդեն խնդիրներ է առաջացրել մի շարք տիեզերական առաքելությունների ժամանակ։
Նոր մարսագնացի անիվները տարբերվում են սովորականներից։ Դրանք ոչ թե պարզապես պտտվում են մակերեսի վրա, այլ շարժվում են այնպես, որ նմանակում են ավազաձուկ մողեսի շարժումները։ Հետազոտողները նախատեսում են զարգացնել նաև ծրագրային ապահովումը, որպեսզի ապագա մարսագնացները կարողանան ինքնուրույն գնահատել սահելու և խրվելու վտանգը, հարմարվել տեղանքի առանձնահատկություններին և առավել արդյունավետ տեղաշարժվել ավազային ու այլ փխրուն մակերեսների վրա։