Գերմանիան մտադիր է ՆԱՏՕ-ի երկրների շարքում ամենամեծ անհատական ներդրումն ունենալ Ուկրաինային տրամադրվող ռազմական աջակցության վերջին փաթեթում, հայտարարել է Գերմանիայի պաշտպանության նախարար Բորիս Պիստորիուսը։
Հունիսին Politico-ի եվրոպական հրատարակությունը, հղում անելով ՆԱՏՕ-ի անդամ երկրների դիվանագետներին, հաղորդել է, որ ՆԱՏՕ-ի անդամները քննարկում են Ուկրաինային տրամադրվող ռազմական օգնության նոր ֆինանսական պարտավորությունները՝ ընդհանուր առմամբ 70 միլիարդ եվրո։
«Դա (Գերմանիայի բաժինը) անկասկած կլինի ամենամեծ առանձին ներդրումը», – ասել է Պիստորիուսը Bild թերթին տված հարցազրույցում՝ Գերմանիայի մասնակցության չափի մասին հարցին պատասխանելով։
Նրա խոսքով՝ Կիևը ակնկալում է ֆինանսավորում ստանալ ոչ միայն ԵՄ վարկերից, այլև «նոր աջակցության ֆոնդից»։
«Խոսքը, ընդհանուր առմամբ, 70 միլիարդ եվրոյի մասին է», – հաստատել է Պիստորիուսը։
Սակայն նա չի նշել այս գումարի շրջանակներում գերմանական ֆինանսավորման ճշգրիտ չափը։