Իսրայելի արտգործնախարար Գիդեոն Սաարը Թուրքիայի արտգործնախարար Հաքան Ֆիդանի հայտարարությունները որակել է որպես «ցեղասպանության հրահրում»։
Ֆիդանը CNN Türk-ին տված հարցազրույցում հայտարարել էր, որ Իսրայելը և նրա ժողովուրդը «իրենց քաղաքականությամբ և մտածելակերպով դարձել են բեռ, որը մարդկությունն այլևս չի կարող կրել»։
Ի պատասխան՝ Սաարը X սոցիալական հարթակում գրել է, որ Թուրքիայի արտգործնախարարի խոսքերը «ցեղասպանության հրահրման դասական օրինակ են»՝ ընդգծելով, որ հրեա ժողովրդին անմարդկայնացնելը և «անտանելի բեռ» անվանելը հիշեցնում է պատմության ամենածայրահեղ և արյունալի ռեժիմների լեզուն։
Իսրայելցի դիվանագետի խոսքով՝ միջազգային հանրությունը և Թուրքիայի ՆԱՏՕ-ի դաշնակիցները պետք է հստակ դատապարտեն նման հայտարարությունները։
Նշվում է, որ Իսրայելի և Թուրքիայի հարաբերությունները զգալիորեն սրվել են 2023 թվականի վերջից՝ Գազայի հատվածում ռազմական գործողությունների ֆոնին։ Երկրները հետ են կանչել դեսպաններին և սառեցրել առևտրային հարաբերությունները, իսկ Անկարան շարունակում է կոշտ քննադատել Իսրայելի քաղաքականությունը։