Փաստաբան Ալեքսանդր Կոչուբաևը, մեկնաբանելով Երևանի ընդհանուր իրավասության քրեական դատարանի հրապարակած մեղադրական վերդիկտը, հայտարարեց, որ այն իր համար անակնկալ չէր։ Հիշեցնենք, որ Դատարանը փաստաբանին մեղավոր ճանաչեց ՀՀ քրեական օրենսգրքի 490-րդ հոդվածի 2-րդ մասով նախատեսված արարքը կատարելու համար։
Նրա խոսքով՝ դեռևս այն ժամանակ, երբ Ազգային անվտանգության ծառայության հատուկ նշանակության ստորաբաժանման կողմից ձերբակալվել և հետագայում կալանավորվել էր, հասկացել էր, որ գործն ավարտվելու է մեղադրական դատավճռով։ Միաժամանակ նա նշեց, որ դատավճիռը, իր գնահատմամբ, մտահոգիչ է Հայաստանի համար՝ այն կապելով խոսքի ազատության, կարծիքի ազատ արտահայտման և դավանանքի ազատության իրավունքների հետ։
Կոչուբաևը կրկնեց իր դիրքորոշումը, որ քրեական հետապնդումը կապված է եղել Հայ առաքելական եկեղեցու և եկեղեցականների շահերը պաշտպանելու իր գործունեության հետ՝ ընդգծելով, որ դատավճիռն իր համոզմունքները չի փոխելու։
Անդրադառնալով հետագա քայլերին՝ նա հայտնեց, որ փաստաբանական թիմը կքննարկի դատավճիռը բողոքարկելու հարցը։ Նրա խոսքով՝ փաստաբաններն ավելի հակված են բողոք ներկայացնելուն, մինչդեռ ինքն անձամբ հակված չէ մասնակցել, իր խոսքով՝ «բեմականացման շարունակությանը»։
Միևնույն ժամանակ փաստաբանը չբացառեց, որ բողոք կներկայացվի բացառապես այն նպատակով, որպեսզի հնարավոր լինի հետագայում դիմել Մարդու իրավունքների եվրոպական դատարան, քանի որ դրա համար անհրաժեշտ է սպառել ներպետական դատական պաշտպանության բոլոր միջոցները։
Ալեքսանդր Կոչուբաևը Iravaban.net-ի հետ զրույցում նաև հայտարարեց, որ գործի քննության ընթացքում Հայաստանում հավատարմագրված մի շարք դեսպանատներ մտահոգություն են հայտնել այս քրեական գործի վերաբերյալ, իսկ որոշները, նրա խոսքով, նույնիսկ առաջարկել են քաղաքական ապաստան տրամադրել։ Նա ընդգծեց, որ մերժել է այդ առաջարկները՝ նշելով, որ Հայաստանը իր երկիրն է, և ինքը մտադիր չէ հեռանալ։
Խոսքի ավարտին Կոչուբաևը շնորհակալություն հայտնեց փաստաբանական համայնքին, միջազգային կազմակերպություններին և դեսպանատներին՝ իր խոսքով՝ ցուցաբերած աջակցության համար, հավելելով, որ այս գործը մարդու իրավունքների պաշտպանության տեսանկյունից լուրջ մտահոգությունների տեղիք է տալիս։
Մանրամասները՝ տեսանյութում։