Հայաստանի վարչապետ Նիկոլ Փաշինյանն ընդունել է Վրաստանի ներքին գործերի նախարար Սուլխան Թամազաշվիլիին, որը պաշտոնական այցով գտնվում է Հայաստանում։
Վարչապետի աշխատակազմի հաղորդմամբ՝ Նիկոլ Փաշինյանը ողջունել է հյուրի այցը և կարևորել Հայաստանի ու Վրաստանի իրավապահ մարմինների միջև համագործակցության շարունակական զարգացումը։
Հանդիպման ընթացքում կողմերը քննարկել են երկու երկրների ՆԳ նախարարությունների համատեղ ծրագրերը՝ առանձնահատուկ ուշադրություն դարձնելով հանցավորության և ապօրինի թմրաշրջանառության դեմ պայքարին, ինչպես նաև ներքին անվտանգության մակարդակի բարձրացմանը։
Սուլխան Թամազաշվիլին նշել է, որ արդյունավետ հանդիպումներ է ունեցել հայ գործընկերների հետ և վստահություն հայտնել, որ համատեղ ծրագրերը նոր խթան կհաղորդեն երկկողմ համագործակցությանը։
Կողմերը նաև մտքեր են փոխանակել հայ-վրացական համագործակցության զարգացման և հետագա քայլերի շուրջ։