ԱՄՆ նախագահ Դոնալդ Թրամփը պահանջել է, որ ԱՄՆ-ում բենզին վաճառող ընկերությունները անհապաղ իջեցնեն իրենց գները և սպառնացել է լուրջ հետևանքներով, եթե դա չանեն։
«Բենզինի մանրածախ վաճառողները պետք է անհապաղ իջեցնեն իրենց գները։ Դրանք չափազանց բարձր են, հաշվի առնելով, որ նավթի գինը ներկայումս 68 դոլար է մեկ բարելի համար և անկում է ապրում», – երկուշաբթի օրը Truth Social-ում գրել է ամերիկացի առաջնորդը։ Նա հավելել է, որ «մանրածախ վաճառողները պետք է արագ գործեն այս հայտարարության հիման վրա»։
«Արհեստական գների բարձրացում չի լինի. դա լիովին անօրինական է: Եթե մանրածախ վաճառողները դա չանեն, մեծ խնդիրներ կլինեն»,-հավելել է Թրամփը։
Վաշինգտոնի վարչակազմի ղեկավարի խոսքով՝ ԱՄՆ-ում բենզինը պետք է արժենա մոտ 2.50 դոլար մեկ գալոնի համար (3.785 լիտր)։ Նա նաև ընդգծել է, որ Կալիֆոռնիան պետք է իջեցնի վառելիքի հարկերը։