Երևանի ավագանու «Մայր Հայաստան» խմբակցության անդամ Գևորգ Ստեփանյանը ֆեյսբուքյան իր էջում հատված է հրապարակել ՍԴ երեկվա նիստից ու գրել հետևյալը. «Սիրելի՛ հայրենակիցներ, ՍԴ-ում ընտրությունների վերաբերյալ քննվող գործի շրջանակներում, տեսնելով այս դրվագը, կարող ենք վերջնական համոզվել, թե ուր «կորան» ԲՀԿ-ի ձայները։
ԲՀԿ-ի ձայները դիտարկել որպես «գնդակ», իսկ գնդակը՝ այսինքն՝ ձայները, Գողացել են…»։
***
«Ժամը 20:00-ից հետո ԶԼՄ-ներում եղան հրապարակումներ, որ տվյալ ընտրատեղամասերում քվեարկությունը շարունակվում է, զինվորներ են քվեարկում: ԿԸՀ-ն այս ուղղությամբ չէր կարո՞ղ գործուն քայլ ձեռնարկել, ինչո՞ւ ԿԸՀ-ն այս երևույթներին արձագանքել է չորս օր անց»,- ՍԴ նիստի ժամանակ դիմելով ԿԸՀ նախագահ Վահագն Հովակիմյանին՝ հարցրեց դատավոր Էդգար Շաթիրյանը: ԿԸՀ նախագահն ասաց՝ մինչև հունիսի 9-ը ժամկետն էր, որ ընտրության մասնակիցները կարող էին տեղամասային ընտրական հանձնաժողովների քվեարկության արդյունքներն անվավեր ճանաչելու պահանջ ներկայացնել. «Անդրադառնալ տեղամասերում քվեարկության խնդիրներին, ըստ էության, պետք է 9-ից հետո անեինք»:
***
«ԱԺ ընտրությունների կոնտեքստում, արդյո՞ք քաղաքական միավորների առաջնորդների կամ ներկայացուցիչների հռետորաբանությունը եղել է այնպիսին, որը կարող էր ազդեցություն ունենալ ընտրողի ազատ կամարտահայտության վրա ու որևէ ազդեցություն գործեր ընտրությունների վերջնարդյունքի վրա: ՔՊ ներկայացուցիչ, փոխքաղաքապետ Սուրեն Գրիգորյանն ասաց՝ ոչ: Դատավորը պարզաբանեց, որ խոսքը բացառապես ՔՊ առաջնորդի մասին չէ, այլ երևույթին գնահատականի, այլ առաջնորդների հռետորաբանության մասին է: Գրիգորյանն ասաց՝ խորությամբ չի ուսումնասիրել մյուս ուժերի հռետորաբանությունը:
***
ՍԴ նիստի ժամանակ դատավոր Էդգար Շաթիրյանը, դիմելով Արամ Վարդևանյանին, ասաց. «Հարցերս ուղղված են «Հայաստան» դաշինքի ներկայացուցչին. ներողություն՝ «Ուժեղ Հայաստան» դաշինքի ներկայացուցչին: Պարո՛ն Վարդևանյան, որևէ տողատակ կամ միտում չկա, ակամայից է ստացվում»:
Նշենք, որ այս թեմայով լրագրողները դիմել էին Արամ Վարդևանյանին՝ հետաքրքրվելով՝ ինչպե՞ս կմեկնաբանի դատավորի շփոթմունքը:
***
«Ինչպե՞ս կմեկնաբանեք, որ դատավորը ձեզ շփոթեց «Հայաստան» դաշինքի ներկայացուցչի հետ»,- ՍԴ նիստից առաջ լրագրողը հարց ուղղեց «Ուժեղ Հայաստան»-ի ներկայացուցիչ, փաստաբան Արամ Վարդևանյանին։ «Ի դեպ, Վահագն Հովակիմյանին էլ շփոթում են ՔՊ-ի հետ, որովհետև 2021թ․ վերջինս որպես ՔՊ ներկայացուցիչ մասնակցում էր ՍԴ նիստին։ 21թ․ ես եղել եմ ՍԴ-ում՝ որպես ներկայացուցիչ, Հովակիմյանը ևս»,- նշեց Վարդևանյանը:
***
«Երբ հանրային ճնշում է լինում ձեզ վրա, վատ բառերով են դիմում, կեղծարար են ասում, ամոթանքներ են տալիս, դա ձեզ վրա վատ չի անդրադառնո՞ւմ, չեք կաշկանդվո՞ւմ դրանից»,- ՍԴ հերթական նիստից առաջ լրագրողը դիմեց ԿԸՀ նախագահ Վահագն Հովակիմյանին։ «Ես նաև այն քաղաքացիների շահերն եմ պաշտպանում, ովքեր ինձ վիրավորում և սպառնում են, ես բոլորիդ ազատ քվեարկելու իրավունքն եմ պաշտպանում»,- ի պատասխան նշեց Հովակիմյանը։