Իսրայելը չի դուրս բերի իր զորքերը Լիբանանի հարավային շրջանների անվտանգության գոտուց, մինչև «Հըզբոլլահի» շիական աշխարհազորայինները չզինաթափվեն։ Այս հայտարարությունն արել է Իսրայելի պաշտպանության նախարար Իսրայել Կացը՝ մեկնաբանելով Իսրայելի և Լիբանանի միջև կնքված համաձայնագիրը։
«Իսրայել պետության և Լիբանանի միջև շրջանակային համաձայնագիրը պատմական իրադարձություն է և Իսրայել պետության անվտանգության ոլորտում նշանակալի քաղաքական նվաճում։ Համաձայնագրում ամրագրված կարևոր սկզբունքն այն է, որ Լիբանանի հարավում իսրայելական զորքերի վերաբաշխում չի լինի, ինչպես նաև զորքերի դուրսբերում չի լինի, մինչև «Հըզբոլլահը» չզինաթափվի ամբողջ Լիբանանում և չերաշխավորվի հյուսիսային Իսրայելի բնակիչների անվտանգությունը», – ասել է Կացը իր մամուլի գրասենյակի կողմից տարածված տեսաուղերձում։ «Իսրայելը չի դուրս բերել իր ուժերը Լիբանանից և պահպանում է անվտանգության գոտի Լիբանանի հարավում, այդ թվում՝ Բոֆորտ լեռնաշղթայում։ Ավելին, Իսրայելի պաշտպանության ուժերը (IDF) պահպանում են գործողությունների ազատություն՝ հյուսիսային Իսրայելի զինվորների և համայնքների վրա հարձակումները կանխելու համար», – հավելեց Կացը՝ նշելով, որ ինքը և Իսրայելի վարչապետ Բենիամին Նեթանյահուն «հրահանգել են IDF-ին պատրաստվել անվտանգության գոտում (հարավային Լիբանանում) երկարատև մնալուն» և «անցկացնել համապատասխան գործողություններ՝ IDF զինվորներին պաշտպանելու և հյուսիսային Իսրայելի համայնքներին սպառնացող վտանգները կանխելու համար»։
Իսրայելի պաշտպանության նախարարի խոսքով՝ «համաձայնագիրը նաև ռազմավարական հարված է Իրանին», որը «փորձում էր ստիպել Իսրայելին դուրս գալ Լիբանանից»։ «Լիբանանի ապագան այլևս չի թելադրվի Իրանի և «Հըզբոլլահի» կողմից», – շարունակել է Կացը։ «Եթե Իրանը փորձի հարձակվել Իսրայելի վրա՝ համաձայնագիրը խափանելու համար, Իսրայելը մեծ ուժով կգործի դրա դեմ»։
Հունիսի 26-ին ԱՄՆ պետքարտուղար Մարկո Ռուբիոն, Վաշինգտոնում Իսրայելի և Լիբանանի դեսպաններ Եչիել Լեյթերի և Նադա Համմադ-ե-Մուավադի հետ միասին, հայտարարեցին շրջանակային համաձայնագրի մասին, որը կողմերը ձեռք են բերել բանակցությունների հինգ փուլից հետո։ Դրա համաձայն՝ իսրայելական ուժերը սկզբում լիբանանյան բանակին կհանձնեն Լիտանի գետից հարավ և հյուսիս գտնվող երկու գոտիները։
Աստիճանաբար լիբանանյան զինված ուժերը կվերականգնեն «ամբողջ տարածքի նկատմամբ արդյունավետ ինքնիշխան վերահսկողությունը»։ Ոչ կառավարական խմբավորումները կզինաթափվեն, իսկ նրանց ռազմական ենթակառուցվածքները կքանդվեն, ինչը կհարթի Իսրայելի լիակատար նահանջի ճանապարհը։