Քաթարի վարչապետ, արտաքին գործոց նախարար շէյխ Մոհամետ Պըն Ապտելռահման Ալ Թանի «Ֆայնենշըլ Թայմզ» օրաթերթին հետ հարցազրոյցի ընթացքին յայտնեց, որ Հորմուզի նեղուցը տակաւին բաց է` նշելով, որ Տոհային հաստատուած է, որ զայն փակելու հրաման չէ տրուած:
ԱՆ ըսաւ, թէ կը նախատեսուի, որ Հորմուզի նեղուցին մէջ նաւարկումը համաձայնութենէն 30 օր ետք վերադառնայ իր բնականոն մակարդակին:
Քաթարի վարչապետը շեշտեց, որ Ուաշինկթընի եւ Թեհրանի միջեւ հաղորդակցութեան կապը անհրաժեշտ է Հորմուզի նեղուցին մէջ նաւարկման խոչընդոտումը արգիլելու եւ այդտեղ ականազերծում կատարելու ընթացքին` աւելցնելով, որ Զուիցերիոյ մէջ համաձայնեցուած հաղորդակցութեան կապը անհրաժեշտ է ապակողմնորոշող տեղեկութիւններէն խուսափելու համար:
Շէյխ Մոհամետ Պըն Ապտելռահման նշեց, որ Զուիցերիոյ մէջ բանակցութիւնները տեւական կարգաւորման բանակցութիւններու ճամբան հարթած են` նշելով, որ աշխատանքը տակաւին սկիզբն է, եւ Քաթար Փաքիստանի հետ կը շարունակէ միջնորդութիւն կատարել` վերջնական լուծման հասնելու համար:
Ան օրաթերթին յայտնեց, որ Հորմուզի նեղուցի կառավարման բնորդը պէտք է քննարկուի Իրանի, Օմանի եւ Ծոցի երկիրներուն հետ` նշելով, որ Քաթար պիտի ընդդիմանայ իրանեան որեւէ ծրագիրի, որ Հորմուզի նեղուցէն անցքին վրայ տուրքեր կը պարտադրէ:
«Կարելի չէ ընդունիլ կացութիւն մը, ուր դէպի աշխարհ մեր դարպասը ըլլայ մէկ կողմի վերահսկողութեան տակ», ըսաւ Քաթարի վարչապետը:
Ան երկուշաբթի օր «Ժազիրա» արբանեակային պատկերասփիւռի կայանին յայտնած էր, որ Միացեալ Նահանգներ-Իրան փոխըմբռնման յուշագիրի ստորագրութենէն ի վեր բանակցային հոլովոյթը խնդիրներ դիմագրաւած է, մասնաւորաբար ինչ կը վերաբերի Հորմուզի նեղուցին եւ Լիբանանին, սակայն աւելցուցած էր, որ մեքանիզմներ մշակուած են` այդպիսի խնդիրներէն խուսափելու համար, եւ այդ մեքանիզմներուն հիմամբ կեդրոնացումը բանակցութիւններուն եւ համաձայնութեան հասնելու վրայ կ՛ըլլայ: