Վենեսուելայում տեղի ունեցած երկրաշարժի հետևանքով հայ ընտանիքների տներ են ավերվել, մի քանի անձ էլ տուժել է։ Տեղեկությունը հայտնում է Մեծի Տանն Կիլիկիո կաթողիկոսությունը։
Ամբողջ օրը կապ է պահպանվել Վենեսուելայի հայ համայնքի հոգևոր հովիվ Գերշ. Տ. Պետրոս եպիսկոպոս Մանվելյանի հետ։
«Սրբազան հոր փոխանցած տեղեկություններով՝ երկրաշարժը մեծ նյութական ու մարդկային վնասներ է հասցրել։ Երկրաշարժին հետևանքով, դժբախտաբար, երկու հայ ընտանիքի տուն քանդվել է, կա մի քանի վիրավոր ու անհետ կորած հայորդի»,–նշված է հաղորդագրությունում։
Հիշեցնենք, որ հունիսի 25-ին Վենեսուելայում 7,2 և 7,5 մագնիտուդով հզոր երկրաշարժեր են գրանցվել. երկրում արտակարգ դրություն է հայտարարվել։ Խափանումներ են գրանցվել ինտերնետի և կապի աշխատանքում, ավերածություններ կան։