25.06.2026 | 00:03
Ես ձեր բարեկամն եմ, կյանքի տխուր ճանապարհների ընկերը:
Ես այդ ճանապարհների վրայից վերցնում եմ եղած գորշությունն ու սարսափը: Ես այլափոխում եմ դրանք: Նույնիսկ երկրավոր բարեկամության դեպքում` հասարակ, տխուր ու քարքարոտ ճանապարհն անգամ, կարող է թվալ երկնքի ճանապարհ, երբ սիրելի բարեկամի ներկայությունը այլափոխում է այն:
Հանգստի օրվա՝ շաբաթի խաղաղությունը թող համակի ձեր սիրտն ու միտքը: Կյանքի մտահոգություններից ու սրտացավերից ձերբազատվեք այդ օրը, կանգ առեք զբաղված կյանքի մայրուղու վրա և հանգիստ ու դադար առեք:
Երբևէ պատկերացրե՞լ եք այն սքանչելիքները, որ կարող եք ունենալ Ինձ հետ բարեկամություն անելիս:
Մտածե՞լ եք, արդյոք, թե ինչ է նշանակում ի զորու լինել հարկ եղած պահին կանչել Աշխարհի Արարիչ Աստծուն:
Անգամ երկրավոր թագավորին ներկայացնող առանձնաշնորհյալ այցելուի համար կա պալատի նախասենյակը ու սպասասրահը և ընդունման ժամը, որ թագավորի հաճույքից է կախված:
Սակայն Իմ հետևորդներին Ես իրավունք եմ տվել` մտնել Իմ ներկայության մեջ, երբ որ կամենան, դեռ սրանից էլ ավելին եմ տվել:
Նրանք կարող են կանչել Ինձ իրենց անկողնու մոտ կամ իրենց վաճառատանը, և Ես այնտեղ եմ գալիս:
Աստվածային սերը սրանից ավելին կարո՞ղ է անել: Քո ամենամտերիմ երկրավոր բարեկամն անգամ չի կարող քո կողքին լինել անմիջապես, բայց քո Տերը, քո Իշխանը, քո Աստվածային Բարեկամը կարող է:
Երբ մարդիկ կամենում են պաշտել Ինձ` պատկերացնում են այն աշխարհները, որոնց վրա Ես իշխանություն ունեմ, մտածում են արարչության մասին, համատարած կարգ ու կանոնի մասին, և այդ ժամանակ է, որ ապրում են երկյուղը, որ հետևում է պաշտամունքին:
Ասում եմ ձեզ՝ ապրեք երկյուղը, ապրեք բաղձանքը` երկրպագելու Ինձ սքանչացումի մեջ հիացքի, սակայն մտածեք նաև Իմ Բարեկամության մասին:
Մտածեք, անգամ առօրյա կյանքի ամենատխուր իրադրությունների ժամանակ: