Թուրքիայի Ազգային մեծ ժողովի նախագահ Նուման Քուրթուլմուշը Բաքվում անցկացվող Իսլամական համագործակցության կազմակերպության խորհրդաժողովի ժամանակ հայտարարել է, որ Թուրքիան լիովին աջակցում է Հայաստանի և Ադրբեջանի միջև ընթացող խաղաղության բանակցություններին։
Քուրթուլմուշը հույս է հայտնել, որ այդ գործընթացը կհանգեցնի երկու երկրների միջև տևական և կայուն խաղաղության հաստատմանը։
Անդրադառնալով տարածաշրջանային այլ զարգացումներին՝ խորհրդարանի նախագահը նաև ողջունել է ԱՄՆ-ի և Իրանի միջև բանակցությունների դրական ընթացքը՝ շեշտելով դրանց կարևորությունը Մերձավոր Արևելքում խաղաղություն ապահովելու և Լիբանանում ռազմական գործողությունները դադարեցնելու հարցում։