«Ուժեղ Հայաստան» դաշինքի պատգամավորի թեկնածու, կալանավորված Դավիթ Ղազինյանը Կենտրոնական ընտրական հանձնաժողովի դեմ հայց է ներկայացրել Վարչական դատարան։
Դատարանից տեղեկանում ենք, որ Ղազինյանը դատարանից պահանջել է անվավեր ճանաչել ԿԸՀ-ի՝ իր նկատմամբ քրեական հետապնդում հարուցելու և ազատությունից զրկելու համաձայնություն տալու որոշումները։
Վարչական դատարանի դատավոր Լիլիթ Սադոյանը հունիսի 18-ին որոշում էր կայացրել վարույթ ընդունել Ղազինյանի հայցը և ԿԸՀ-ից պահանջել վիճարկվող որոշումների հիմքում ընկած նյութերն ու նիստի ձայնագրությունները։ Մեկ այլ որոշմամբ՝ դատարանը գործով որպես երրորդ կողմ ներգրավել է ՀՀ գլխավոր դատախազությանը, որը հունիսի 6-ին Ղազինյանին անձեռնմխելիությունից զրկելու և նրա նկատմամբ քրհետապնդում հարուցելու միջնորդություն էր ներկայացրել ԿԸՀ։
Գործի քննությունը նշանակվել է հունիսի 22-ին։
ԿԸՀ-ն հունիսի 17-ին համաձայնություն էր տվել Ղազինյանի նկատմամբ քրեական հետապնդում հարուցելուն և նրան ազատությունից զրկելուն։ Նրան մեղադրանք էր առաջադրվել ընտրակաշառք տալու նախապատրաստման համար։ Պաշտպանական կողմը գործը քաղաքականապես մոտիվացված էր որակել և հայտարարել, որ մեղադրանքը հիմնավորող փաստեր չկան։
Հունիսի 17-ին Ղազինյանին ձերբակալվել, հունիսի 18-ին երկու ամսով կալանավորվել էր։
