«Ինժեներական քաղաքի» Բարձր տեխնոլոգիական աքսելերատորում տեղի է ունեցել ՀՀ կառավարության որոշմամբ ձևավորված հավաստագրման հանձնաժողովի հերթական նիստը, որը վարել է ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը։
ԲՏԱ նախարարության փոխանցմամբ՝ նիստի ընթացքում քննարկվել է «Արիդես» ՍՊԸ-ի՝ Ինժեներական քաղաքի ռեզիդենտի կարգավիճակ ստանալու հայտը։
Ընկերության ներկայացուցիչները հանգամանալից ներկայացրել են կազմակերպության գործունեությունը, արտադրական կարողություններն ու զարգացման ծրագրերը։ «Արիդես»-ը մասնագիտացած է չափիչ սարքավորումների, ալկոթեստերների, վերականգնողական տեխնիկական միջոցների, ինչպես նաև բժշկական սարքավորումների ու պարագաների նախագծման և արտադրության մեջ։
Հանձնաժողովի անդամները քննարկել են ընկերության գործունեության տեխնոլոգիական ուղղվածությունը, արտադրական ներուժը և Ինժեներական քաղաքի էկոհամակարգում ինտեգրվելու հնարավորությունները։
Քննարկման և քվեարկության արդյունքում հավանության է արժանացել «Արիդես» ՍՊԸ-ի հայտը, և ընկերությունը ստացել է Ինժեներական քաղաքի ռեզիդենտի կարգավիճակ՝ դառնալով էկոհամակարգի 17-րդ ռեզիդենտը։
Ինժեներական քաղաքի ռեզիդենտների շարքի ընդլայնումը նպաստում է բարձր տեխնոլոգիական և ինժեներական ոլորտների զարգացմանը, արտադրական կարողությունների ամրապնդմանը և տեխնոլոգիական համագործակցության նոր հնարավորությունների ձևավորմանը Հայաստանում։