Վերահսկողական գործիքակազմի ներկայիս բացակայությունը տեսչական մարմնին հնարավորություն չի տալիս լիարժեք պատկերացում կազմել դեղերի ոչնչացման իրական ընթացքի մասին: Այսինքն՝ փաստաթղթային ձեւակերպումից հետո առկա են հնարավոր ռիսկեր, եւ եղել են նախադեպեր, երբ այդ դեղերը կրկին հայտնվել են շուկայում ու իրացվել: Նախագծի նպատակը նմանատիպ բոլոր դեպքերի բացառումն է: Այս մասին ասել է Առողջապահության հարցերի մշտական հանձնաժողովի նախագահ Վանիկ Օհանյանը ՀՀ ԱԺ հունիսի 17-ի նիստում:
Առաջին ընթերցմամբ քննարկվել է պատգամավորներ Վանիկ Օհանյանի եւ Լուսինե Բադալյանի հեղինակած ««Դեղերի մասին» օրենքում լրացում եւ փոփոխություններ կատարելու մասին» եւ «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին» օրենքների նախագծերի փաթեթը:
Ըստ հիմնական զեկուցողի՝ օրենսդրական նախաձեռնությունը մանրամասն քննարկվել է Առողջապահության նախարարության, Առողջապահական եւ աշխատանքի տեսչական մարմնի, ինչպես նաեւ Շրջակա միջավայրի նախարարության գործընկերների հետ եւ արժանացել դրական գնահատականի:
Նախագծերի ընդունումը պայմանավորված է ՀՀ առողջապահական եւ աշխատանքի տեսչական մարմնի կողմից դեղերի շրջանառության վերահսկողության ոլորտում իրականացված ստուգումների, վարչական վարույթների ընթացքում ի հայտ եկած խնդիրների լուծման, իրականացվող վերահսկողության արդյունավետության բարձրացման անհրաժեշտությամբ:
Գլխադասային՝ Առողջապահության հարցերի մշտական հանձնաժողովի դրական եզրակացությունն օրենքների նախագծերի փաթեթի վերաբերյալ ներկայացրել է հանձնաժողովի անդամ Լուսինե Բադալյանը՝ կոչ անելով կողմ քվեարկել:
Հարակից զեկուցող, Առողջապահության նախարարի տեղակալ Արմեն Գասպարյանը տեղեկացրել է, որ Կառավարությունն օրենսդրական փաթեթի վերաբերյալ ներկայացրել է մի շարք առաջարկներ, որոնք ընդունվել են: