Ինչպես հայտնի է՝ ԱՄՆ նախագահ Դոնալդ Թրամփը հայտարարել է, որ Իրանի հետ պատերազմի դադարեցման վերաբերյալ նախնական համաձայնագիրն արդեն ստորագրված է։
ԱՄՆ փոխնախագահ Ջեյ Դի Վենսն էլ CNN-ին տված հարցազրույցում մանրամասներ է հայտնել ստորագրված փաստաթղթից։ Ըստ նրա՝ ԱՄՆ-ի և Իրանի միջև փոխըմբռնման հուշագիրը զբաղեցնում է «մոտ մեկուկես էջ» և շատ ընդհանուր փաստաթուղթ է։ Վենսը հավելել է, որ շատ մանրամասներ կհամաձայնեցվեն ապագա բանակցությունների ընթացքում։
«Մի շարք հարցերի շուրջ մենք ստիպված կլինենք մանրամասները մշակել բանակցությունների տեխնիկական փուլում, սակայն հուշագիրը ստեղծում է այն հիմքը, որի շրջանակներում իրանցիները օգուտներ կստանան գործարքից՝ կատարելով իրենց պարտավորությունները»,— ասել է նա։
Վենսի խոսքով՝ փաստաթղթի առաջին կետում նշվում է, որ Իրանը պարտավորվում է ձգտել «տարածաշրջանային խաղաղության և կայունության», ինչը, ըստ նրա, ներառում է «ահաբեկչական կազմակերպությունների» ֆինանսավորման դադարեցումը։
«Ամենակարևորն այն է, որ նրանք կտան ստուգելի պարտավորություն՝ միջուկային զենք չստեղծելու վերաբերյալ»,— ասել է Վենսը։
Նշենք, որ ըստ Axios-ի՝ «Փոխըմբռնման հուշագիրը» էլեկտրոնային ստորագրության միջոցով ստորագրել են Թրամփն ու Վենսը՝ ԱՄՆ կողմից, խորհրդարանի խոսնակ Ղալիբաֆը՝ Իրանի։