Հնդկաստանի Պաշտպանական հետազոտությունների և զարգացման կազմակերպությունը հաջողությամբ փորձարկել է LRLACM-ը՝ մեծ հեռահարության, ճշգրիտ կառավարվող թևավոր հրթիռը, որը նախատեսված է ցամաքային թիրախներին հարվածելու համար։ Այս մասին հայտնել են Հնդկաստանի պաշտպանության նախարարության մամուլի ծառայությունից:
Փորձարկումները տեղի են ունեցել Օդիշա նահանգի արևելքում գտնվող Չանդիպուրի հրթիռային պոլիգոնում։ Թռիչքի ընթացքում LRLACM-ի աշխատանքը վերահսկվել է ռադարի, էլեկտրաօպտիկական համակարգերի և հեռաչափության միջոցով՝ ապահովելով դրա արդյունավետության ճշգրիտ մոնիթորինգը։
LRLACM-ը թռչում է մինչձայնային արագությամբ և ցածր բարձրություններում։ Այն համարվում է ամերիկյան Tomahawk հրթիռի անալոգը և նախատեսված է ցամաքային և ռազմածովային ուժերի կողմից օգտագործման համար։ Հնդկական գաղտագողի թևավոր հրթիռն ունի առավելագույնը 1500 կմ թռիչքի հեռավորություն և կարող է կրել մինչև 300 կգ քաշ ունեցող միջուկային կամ բարձր պայթուցիկ բեկորային մարտագլխիկ։