Մեծ Բրիտանիայի վարչապետ Քիր Սթարմերը ՆԱՏՕ գլխավոր քարտուղար Մարկ Ռյութեին հայտնել է հուլիսին Անկարայում կայանալիք դաշինքի գագաթաժողովից առաջ կառավարության պաշտպանական ներդրումների ծրագիրը հրապարակելու մտադրության մասին, հաղորդել է Reuters-ը՝ հղում կատարելով Դաունինգ սթրիթի ներկայացուցչին։
Բրիտանական կառավարության տվյալներով՝ հեռախոսազրույցի ընթացքում կողմերը քննարկել են ՆԱՏՕ հավաքական պաշտպանության ամրապնդման և աճող սպառնալիքներին արձագանքումն արագացնելու անհրաժեշտությունը։
Հաղորդվել է, որ Ռյութեն ողջունել է Մեծ Բրիտանիայի պաշտպանական ծախսերի ավելացումն ու դրանց ներդրումը դաշինքի ընդհանուր անվտանգության մեջ։
Լոնդոնում ընդգծել են, որ պաշտպանական ներդրումների ծրագրի հրապարակումը կիրականացվի մինչև ՆԱՏՕ գագաթաժողովը։ Փաստաթուղթը պետք է ներկայացվեր ավելի վաղ, սակայն դրա պատրաստումը հետաձգվել էր։
Առանձին նշվել է, որ վարչապետը հաստատել է Մեծ Բրիտանիայի պաշտպանական ծախսերը հաջորդ խորհրդարանական շրջափուլում ՀՆԱ 3 տոկոսին հասցնելու մտադրությունը՝ ընդգծելով ազգային անվտանգության առաջնահերթությունը պետական քաղաքականության մեջ։