Եւրոպական Միութեան անդամ երկիրները կը դիտարկեն Եւրոպական Միութեան դիւանագիտական ծառայութեան հաւանական արմատական բարեփոխումներու տարբերակները` Եւրոպական արտաքին գործողութիւններու ծառայութեան եւ անոր ղեկավար Քայա Քալլասի աշխատանքին մէջ գոյութիւն ունեցող անյաջողութիւններու լոյսին տակ: Այս մասին կը հաղորդէ բրիտանական «Ֆայնենշըլ Թայմզ» օրաթերթը` յղում կատարելով իր աղբիւրներուն:
«Ակնյայտ է, որ Եւրոպական արտաքին գործողութիւններու ծառայութիւնը աշխարհի վրայ չ՛աշխատիր այնպէս, ինչպէս պէտք է: Անիկա անգործունեայ է: Խնդիրը կառուցուածքային է, ուստի կառուցուածքը պէտք է վերականգնել», ըսած է աղբիւրը:
Կը նշուի, որ եւրոպական երկիրները կը դիտարկեն Քալլասն ու 1 միլիառ եւրօ պիւտճէ ունեցող անոր բաժինը լիազօրութիւններէ զրկելու կարելիութիւնը` նպատակ ունենալով Եւրոպական Միութեան արտաքին գործողութիւններու ծառայութեան գործառոյթները փոխանցել Եւրոպական Միութեան անդամ երկիրներուն:
Աղբիւրներու տեղեկութեամբ, Փարիզի առաջարկը կը ներառէ եւրոդիւանագիտութեան ղեկավարի ինքնավարութեան հաւանական սահմանափակում եւ ամբողջ աշխարհի վրայ անոր ներկայացուցչութիւններուն նկատմամբ վերահսկողութեան թուլացում: Ասոր իբրեւ հետեւանք, ինչպէս կ՛ընդգծեն աղբիւրները, իրական վտանգ կայ, որ այդ ծառայութիւնը վերացուի: Միեւնոյն ժամանակ, անդամ երկիրներու ներկայացուցիչները վստահ են, որ Եւրոպական Միութեան արտաքին գործողութիւններու ծառայութեան բարեփոխումը կրնայ օգնել խնայել Պրիւքսելի մէջ միջոցները եւ զգալիօրէն կրճատել դիւանակալական կառոյցը:
Որոշ եւրոպական երկիրներ մասնաւոր կարգով կը պնդէին, որ ներկայիս չափազանց մեծ տարբերութիւններ եւ համակարգման բացակայութիւն կայ Եւրոպական Միութեան արտաքին գործողութիւններու ծառայութեան, ազգային արտաքին գործոց նախարարութիւններու եւ Եւրոպական յանձնաժողովի ու Եւրոպական խորհուրդի արտաքին կապերու բաժիններուն միջեւ:
Աւելի՛ն, Եւրոպական Միութիւնը պատուհասած ճգնաժամերը եւրոպացի քաղաքական գործիչներուն ստիպած են սկսիլ կասկածիլ ժամանակին որոշումներու կայացման համակարգման հարցին մէջ Եւրոպական Միութեան արտաքին գործողութիւններու ծառայութեան դերի արդիւնաւէտութենէն:
Կը նշուի նաեւ, որ Քալլաս յաճախ իր սեփական կարծիքը կ՛արտայայտէ այն հարցերուն վերաբերեալ, որոնց պատասխանը պէտք է համաձայնեցուած ըլլայ հաւաքականօրէն: