Այս մասին հունիսի 12-ին Ազգային ժողովում լրագրողների հետ ճեպազրույցում ասել է ՆԳ նախարար Արփինե Սարգսյանը՝ անդրադառնալով 12-ամյա աշակերտի օրգանիզմում ենթադրյալ թմրամիջոց հայտնաբերելու դեպքին։
«Ունենք հաղորդում, որը փոխանցել ենք քննչական մարմնին։ Ոստիկանությունն օպերատիվ- հետախուզական աշխատանքներ է տանում։ Սկզբից ունեինք անձ նույնականացված, բայց կարծես թե փաստերը բավարար չեն եղել, որպեսզի վստահ լինենք, որ տվյալ անձն է կատարել:
Հավելյալ մանրամասներ այս պահի դրությամբ չեմ կարող հայտնել։ Ինչպես գիտեք, փորձաքննության արդյունքում նախնական տվյալներով՝ թմրամիջոցի հետք էր հայտնաբերվել։ Այս պահի դրությամբ աշխատում ենք, որպեսզի տեսնենք՝ ամբողջ պատկերն ինչպիսին է, և արագ գնանք առաջ։ Հարցն իմ վերահսկողության ներքո է գտնվում, և ճշգրիտ ինֆորմացիա ունենալու պայմաններում կներկայացնենք»,- հավելել է նախարարը։
Արփինե Սարգսյանի խոսքով՝ նախքան առաջնային փորձաքննության արդյունքների հայտնի դառնալը երեխայի ծնողների համար անհասկանալի է եղել, թե ինչու է երեխայի առողջական վիճակը կտրուկ վատացել։
«Սկզբից ծնողների համար անհասկանալի է եղել, թե ինչի պատճառով է դեպքը տեղի ունեցել, բայց հետագայում քանի որ ունեցել ենք առաջնային մասնագիտական կարծիք, թմրամիջոցի հետք էր հայտնաբերվել, բոլոր ուժերը լարել ենք, որպեսզի հասկանանք, թե ինչպես է դեպքը տեղի ունեցել, ինչ պայմաններում և արդյոք գործ ունենք վերջնական փորձաքննությամբ թմրամիջոցի հետ»,- մանրամասնել է նախարարը:
Նա հավելել է, որ տարբեր վարկածներ են քննարկվել, քանի որ էքսկուրսիայի էին գնացել տվյալ դասարանով, ուսուցիչները ևս ուղեկցել են, տարբեր վարկածներ են եղել՝ կապված միջավայրի հետ:
«Այս պահին թույլ տվեք ձեռնպահ մնալ որևէ բան հայտարարելուց, որովհետև որոշ վարկածներ կային, որոնք հերքվեցին»,- հայտնել է նախարարը և նշել, որ երեխայի առողջական վիճակում դրական փոփոխություններ կան, նա որոշակի տվյալներ է հաղորդել արդեն։