Հենրիխ Մխիթարյանը ևս մեկ մրցաշրջանով կերկարաձգի պայմանագիրը Միլանի «Ինտերի» հետ, սակայն այս համաձայնագիր խիստ ուշագրավ մանրամասներ ունի։
Միլանյան ակումբի մարզական տնօրեն Պիերո Աուզիլիոն բացահայտել է, որ հայ ֆուտբոլիստը բանակցությունները վարում է ամբողջությամբ ինքնուրույն՝ առանց որևէ գործակալի միջամտության։
«Իմ ողջ փորձի ընթացքում հանդիպել եմ միայն մեկ ֆուտբոլիստի, ով ամեն ինչ անում է ինքնուրույն և ամեն առումով միջինից բարձր մակարդակի վրա է՝ լինի դա խաղադաշտում, դրանից դուրս, թե սեփական կարիերայի կառավարման հարցում։ Նա կմնա «Ինտերում», և դուք արդեն հասկացաք, թե ում մասին է խոսքը։ Հայը, ով սլանում է գնացքի պես, իսկապես այլ հարթության մեջ է»,- Աուզիլիոյի խոսքն է մեջբերում La Gazzetta dello Sport-ը։
Աուզիլիոյի խոսքերից հստակեցվում է երկու կարևոր բան։ Նախ, Մխիթարյանը շուտով պաշտոնապես կստորագրի ևս մեկ տարվա պայմանագիր։
Երկրորդ՝ «հայը, ով սլանում է գնացքի պես» (այսպես են նրան կնքել Աուզիլիոն, թիմակիցներն ու երկրպագուները), ինքն է վարել բանակցությունները՝ առանց հատուկ պահանջների։ Նա ընդունել է աշխատավարձի բնականոն նվազեցումը ներկայիս համաձայնագրի համեմատ (այժմ նա ստանում է տարեկան 4 միլիոն եվրո մաքուր եկամուտ)։
Մխիթարյանը ղեկավարությանը պայմաններ չի թելադրել և ներկայացել է բանակցություններին, որոնք նախաձեռնել էր Քրիստիան Կիվուն։ Վերջինս հայ կիսապաշտպանին առանցքային ֆիգուր է համարում նաև հաջորդ մրցաշրջանի համար։
Հաջորդ հունվարին Հենրիխը կդառնա 38 տարեկան, և հենց նրա ֆուտբոլային հասունությունն է դարձել թիմի կազմում մնալու գլխավոր գրավականը։ Մխիթարյանը երկար մտածել է հնարավոր հեռանալու և տարբերակների շուրջ, սակայն ի վերջո որոշել է ընդառաջել Կիվուի ցանկությանը՝ շարունակել համագործակցությունը։
Ակումբում բարձր են գնահատում ոչ միայն Մխիթարյանի խաղային ինտելեկտը, այլև նրա մարդկային տեսակը։