ԱՄՆ նախագահ Դոնալդ Թրամփը հայտարարել է, որ Իրանը Հորմուզի նեղուցում խոցել է ամերիկյան Apache ուղղաթիռ և խոստացել է, որ Վաշինգտոնը կպատասխանի։
«Միացյալ Նահանգները անպայման պետք է արձագանքի այս հարձակմանը», – Reuters-ը մեջբերել է սոցիալական ցանցերում արված Թրամփի խոսքերը։
Նախագահը նաև նշել է, որ ուղղաթիռի երկու օդաչուները չեն տուժել։ ԱՄՆ զինված ուժերը հայտնել են, որ ուղղաթիռի անձնակազմի անդամները գտնվել և փրկվել են ԱՄՆ ռազմածովային ուժերի անօդաչու նավակի կողմից։ ԱՄՆ կենտրոնական հրամանատարությունը չի բացահայտել ուղղաթիռի խոցման պատճառը, բայց հայտնել է, որ օդաչուները փրկվել են երկու ժամ անց և գտնվում են կայուն վիճակում։
Axios-ը, հղում անելով աղբյուրին, հայտնել է, որ ամերիկյան AH-64 Apache ուղղաթիռը խոցվել է իրանական անօդաչու թռչող սարքի կողմից և հետագայում կործանվել։
Իրանի արտաքին գործերի նախարար Աբբաս Արաղչին հայտարարել է, որ Իրանի տարածքի մոտ գործող օտարերկրյա ուժերը «մշտական ռիսկի տակ են իրենց սեփական սխալների, պարզ վթարների կամ խաչաձև կրակի տակ հայտնվելու հնարավորության պատճառով»։ «Ռիսկը նվազեցնելու համար նրանց համար լավագույն լուծումը կլինի հեռանալը», – գրել է նա սոցիալական ցանցերում։
ԱՄՆ-ն և Իսրայելն սկսել էին հարվածներ հասցնել Իրանին փետրվարի 28-ին։ ԶԼՄ-ները մայիսի վերջին հայտնել էին, որ ԱՄՆ-ն ու Իրանը մոտ են 60-օրյա հրադադարի համաձայնագիր կնքելուն։ Այս ֆոնին, սակայն, ԱՄՆ-ն և Իրանը շարունակել են հարվածներով փոխանակվել։ Հունիսի 9-ին ԱՄՆԹրամփը հայտարարել էր, որ Միացյալ Նահանգներն առաջիկա երկու շաբաթվա ընթացքում կհայտարարի Իրանի նկատմամբ «լիակատար հաղթանակի» մասին և կկնքի վերջնական գործարք։
