ՀՀ ԱԺ ֆինանսավարկային եւ բյուջետային հարցերի ու արտաքին հարաբերությունների, տարածաշրջանային եւ եվրասիական ինտեգրման ու եվրոպական ինտեգրման հարցերի մշտական հանձնաժողովների համատեղ նիստում հունիսի 8-ին քննարկվել է «ՀՀ 2025 թվականի պետական բյուջեի կատարման մասին» տարեկան հաշվետվությունը:
Քննարկման առանցքում էին պետական բյուջեի եկամուտների եւ ծախսերի կատարողականները, ԱԳՆ-ին, միջազգային կազմակերպություններին անդամակցության վճարները, ԵԱՏՄ եւ տարածաշրջանի մյուս երկրների հետ կապերը, եվրոպական ինտեգրմանն առնչվող հարցերը:
Մինչ բյուջետային փաստաթղթի բովանդակային եւ թվային ցուցանիշներին անդրադառնալը՝ ԱԳ նախարար Արարատ Միրզոյանը շնորհավորել է քաղաքացիներին նախորդ օրը կայացած խորհրդարանական ընտրությունների կապակցությամբ:
Արարատ Միրզոյանի տեղեկացմամբ հաշվետու տարում ԱԳ նախարարության հաստատված բյուջեն կազմել է 18.1 մլրդ դրամ, ճշտված բյուջեն՝ 21 մլրդ դրամ: Ծախսերը կազմել են 20 մլրդ 961 մլն դրամ: Շուրջ 80 մլն դրամ չի ծախսվել, որը վերադարձվել է պետական բյուջե: Ոլորտում կատարողականը կազմել է 99.6 տոկոս:
«Փաստացի, ճշտված բյուջեն 3 մլրդով ավելի էր հաստատված բյուջեից: Այս ավելացումը կատարվել է նախ Բրյուսելում ՀՀ դեսպանության շենքի ձեռքբերման նպատակով՝ 1.9 մլրդ դրամ, ինչպես նաեւ տարբեր միջոցառումների ավելացման, պակասեցման արդյունքում՝ 0.7 մլրդ դրամ»,- պարզաբանել է նախարարը:
Նշվել է, որ նախարարությունը հաշվետու տարում իրականացրել է 5 բյուջետային հիմնական ծրագիր:
«Ընդհանուր առմամբ, Հայաստանը դիվանագիտական հարաբերություններ ունի 186 երկրի հետ, 2025 թվականին 3 երկրներ են ավելացել այս ցանկին: Այդ երկրներն են՝ Լեսոթոյի Թագավորությունը, Սողոմոնի Կղզիները եւ Պակիստանը»,- ասել է Արարատ Միրզոյանը եւ հավելել, որ ընթացիկ տարում դիվանագիտական հարաբերություններ են հաստատվել նաեւ Սամոայի հետ:
2025 թվականին ստորագրվել է 127 պայմանագիր, որոնցից 68-ը մտել են ուժի մեջ:
Աշխատանքներ են իրականացվել թվայնացման ուղղությամբ, ինչը շարունակվում է:
Ներկայացնելով արտաքին ոլորտում տեղի ունեցած քաղաքական իրադարձությունները՝ ԱԳ նախարարն անդրադարձել է 2025 թվականի օգոստոսի 8-ին վաշինգտոնյան համաժողովում ընդունված հռչակագրին՝ ստորագրված ՀՀ վարչապետի եւ Ադրբեջանի նախագահի կողմից, որը որպես ականատես ստորագրել է նաեւ ԱՄՆ նախագահը:
Արարատ Միրզոյանը ներկայացրել է նաեւ վերոնշյալ իրադարձությանը հաջորդած մյուս կարեւոր գործընթացները, նշել հաշվետու տարում ընդլայնված ռազմավարական գործընկերությունները: Նախարարի խոսքով հաշվետու տարում հաստատվել է վեց նոր ռազմավարական գործընկերություն: Ընթացիկ տարում եւս գործընթացը շարունակվում է: Արարատ Միրզոյանն անդրադարձել է նաեւ Թուրքիայի հետ հարաբերություններին՝ վստահություն հայտնելով, որ առաջիկայում ամբողջական կարգավորում կարձանագրվի: Նրա տեղեկացմամբ այժմ Թուրքիայի եւ Հայաստանի միջեւ ուղիղ առեւտուր է ընթանում:
«Մաքսային իմաստով է ուղիղ առեւտուր, իսկ աշխարհագրորեն դա դեռեւս տեղի է ունենում երրորդ երկրների տարածքով»,- պարզաբանել է նախարարը:
«Եվրոպական միության հետ ունենք շատ հարուստ եւ աճող օրակարգ: Կարծում եմ՝ քաղաքացիներին հետաքրքրող թիվ մեկ հարցն այստեղ վիզաների ազատականուցումն է: Այստեղ ունենք շոշափելի առաջընթաց, եւ կարծում եմ, որ սահմանված գրաֆիկով մենք բավական արագ ենք ընթանում դեպի վերջնական ազատականացում»,- ասել է Արարատ Միրզոյանը:
Նախարարը նաեւ պատասխանել է պատգամավորների հարցերին, որոնք վերաբերում էին պետական բյուջեի ծախսային ուղղություններին, Ղազախստանում ՀՀ դեսպանություն ունենալուն, ԵՄ երկրներ գյուղատնտեսական ապրանքներ արտահանելու հարցին եւ այլ թեմաների: