Ռուսաստանի նախագահ Վլադիմիր Պուտինն արձագանքել է Ուկրաինայի առաջնորդ Վլադիմիր Զելենսկու բաց նամակին, նշելով, որ նրա հետ հանդիպելու իմաստ առայժմ չի տեսնում։
Ռուսաստանի նախագահը, ելույթ ունենալով Սանկտ Պետերբուրգի միջազգային տնտեսական համաժողովի լիագումար նիստում, պատասխանել է Զելենսկու նամակի վերաբերյալ հարցին։
Նա հաստատել է, որ իր մամուլի քարտուղար Դմիտրի Պեսկովն իրեն ծանոթացրել է նամակի բովանդակությանը. «Առավոտյան Պեսկովը թղթիկը տվեց»։
Պուտինն իր խոսքի մեծ մասը նվիրել է նամակի տոնայնության քննադատությանը՝ այն անվանելով լկտի։ Նրան դուր չի եկել, որ Զելենսկին հիշատակել է իր տարիքն ու պաշտոնավարման ժամկետը։ Զելենսկու մասին խոսելիս անվանել է նրան «նամակի հեղինակ»։
Պուտինը քննադատել է Ուկրաինայի նախագահին այն բանի համար, որ նա իբր այլևս չի ցանկանում ԱՄՆ-ին տեսնել որպես հակամարտության կարգավորման երաշխավոր։
«Ինչու են մերժում նախագահ Թրամփին՝ այնքան էլ հասկանալի չէ. զենք ստանալ ցանկանում են, իսկ որպես երաշխավոր տեսնել չեն ցանկանում»,— հայտարարել է Պուտինը։ Նա հիշել է ուկրաինական առաջնորդի հանդիպումը Դոնալդ Թրամփի հետ, որի ժամանակ ԱՄՆ նախագահն ասել էր, թե Զելենսկին «խաղաքարտեր չունի», և դա անվանել է «նամակի հեղինակի դաստիարակում»՝ հավելելով, որ ցանկանում է «շնորհակալություն հայտնել Դոնալդին կատարած աշխատանքի համար»։
Պուտինը կրկնել է Թրամփի խոսքերն այն մասին, որ եթե ինքը լիներ ԱՄՆ նախագահը, պատերազմը, հնարավոր է, չլիներ. Ռուսաստանի նախագահի կարծիքով՝ Թրամփը «ավելի շատ ջանքեր կգործադրեր խաղաղ լուծման համար»։ Նա հավելել է, որ Թրամփին վերաբերվում է «ինչպես գործընկերոջ՝ հարգանքով»։
Այդուհանդերձ, նա նշել է, որ առանցքային հարցերը միմյանց միջև պետք է լուծեն Ռուսաստանն ու Ուկրաինան, իսկ մյուս երկրները կարող են հանդես գալ որպես երաշխավորներ։
Պատասխանելով Զելենսկու հետ հանդիպելու իր պատրաստակամության մասին հարցին՝ Պուտինն ասել է, որ դրանում իմաստ չի տեսնում. նրա կարծիքով՝ Ուկրաինային այդ հանդիպումն անհրաժեշտ է միայն ռուսական հարձակումը կանգնեցնելու համար։ Դրանից հետո նա դիմել է ռազմաճակատում գտնվող ռուս զինվորականներին՝ ասելով. «Աշխատե՛ք, եղբայրներ»։