Երևանի քաղաքապետ Տիգրան Ավինյանը Հանրապետության հրապարակում «Քաղաքացիական պայմանագիր» կուսակցության քարոզարշավի շրջանակներում կայացած ամփոփիչ հանրահավաքի ժամանակ հայտարարել է, որ Հայաստանը ներկայում առավել քան երբևէ ազատ, անկախ և ինքնիշխան է։
«Այսօր կանգնած ենք Երևանի սրտում՝ Հանրապետության հրապարակում՝ ազատ, անկախ, ինքնիշխան՝ առավել քան երբևէ»,- նշել է նա։
Ավինյանի խոսքով՝ երկրում ձևավորվել է նոր մթնոլորտ, որը մարդկանց տալիս է հանգստություն և ներքին խաղաղություն։ Նրա գնահատմամբ՝ այդ խաղաղությունը գալիս է առաջին հերթին երկրի սահմաններից և Հայաստանի համար առանձնահատուկ արժեք ունի։
Քաղաքապետը նաև կոշտ քննադատության է ենթարկել այն անձանց, որոնք, իր խոսքով, գործում են այլ երկրների հատուկ ծառայությունների հրահանգներով և փորձում են խաթարել երկրի խաղաղությունը։
«Մարդիկ, ովքեր ծառայում են այլ երկրների հատուկ ծառայությունների հրահանգներով, եկել են և ուզում են մեր խաղաղությունը խլել։ Մենք նրանց ասում ենք՝ գնացեք գրողի ծոցը»,- հայտարարել է Ավինյանը։
Նա ընդգծել է, որ հասարակությունը գիտակցում է խաղաղության արժեքը և թույլ չի տա վերադարձ այն երևույթներին, որոնք, նրա բնորոշմամբ, կապված են ընտրակաշառքի բաժանման և նախկին արատավոր գործելակերպերի հետ։
«Մենք գիտենք, թե ինչ արժեք ունի խաղաղությունը, և այդ ընտրակաշառք բաժանող ստահակները չեն կարող վերադառնալ»,- ասել է Երևանի քաղաքապետը։