Մեր տնտեսվարողները կանգնած են այնպիսի խնդիրների առաջ, որ Հայաստանի նորագույն պատմության մեջ երբեք չեն ունեցել։ Այս մասին Աբովյանում նախընտրական քարոզարշավի ժամանակ հայտարարել է «Ուժեղ Հայաստան» կուսակցության անդամ Արամ Վարդևանյանը։
«Հայաստանի իշխանությունները որևէ քայլ չեն ձեռնարկում երկրի առաջ ծառացած խնդիրները լուծելու համար։ Մենք ունենք բազմաթիվ հայրենակիցներ, որոնք պետության հոգածության և պաշտպանության կարիքը ունեն։ Ի՞նչ են իրենք անում՝ ոչի՛նչ»,- նշել է Վարդևանյանը։
Նա հավելել է, որ հասարակությանը, ժողովրդին, քաղաքացիներին սիրում են գործով, արդյունքներով՝ աղքատությունը վերացնելով և բարեկեցություն ստեղծելով, այլ ոչ թե զուտ բառերով։
«Եթե Փաշինյանի Հայաստանի ղեկավարը լիներ Սամվել Կարապետյանը, և որևէ տնտեսվարող մեկ խնդիր ունենար, ապա նա աշխարհը շուռ կտար, բայց իր քաղաքացու, գործարարի, բարիք ստեղծողի խնդիրը կլուծեր»,-ընդգծել է կուսակցության անդամը։