Ղազախստան կատարած այցից հետո ՌԴ նախագահ Վլադիմիր Պուտինը պատասխանել է լրագրողների հարցերին՝ անդրադառնալով Եվրասիական տնտեսական միությունից (ԵԱՏՄ) Հայաստանի հնարավոր դուրս գալու սցենարին: ՌԻԱ Նովոստին ներկայացրել է նախագահի հայտարարության առանցքային դրույթները:
Ռուսաստանի ղեկավարը զգուշացրել է, որ միությունից դուրս գալու դեպքում Երևանը կկորցնի ազատ առևտրի համաձայնագրերին հասանելիությունը: Նրա խոսքով՝ Մոսկվան ստիպված կլինի ընդհանուր առմամբ կրճատել տնտեսական և ինտեգրացիոն ոլորտներում Հայաստանի հետ իրականացվող գրեթե բոլոր համատեղ աշխատանքները:
Բացի այդ, Հայաստանը կբախվի բեռնափոխադրող ընկերությունների համար սահմանվող ավելի խիստ պահանջների: Ամենալուրջ հարվածներից մեկը կլինի վառելիքի գների բարձրացումը. էներգակիրների թանկացումը Երևանի վրա կստնի երկրի ՀՆԱ-ի 14%-ը: Պուտինը համեմատել է գները՝ նշելով, որ Եվրոպայում գազի գինը կազմում է 600 եվրո, մինչդեռ Հայաստանն այն ստանում է 150 եվրոյից մի փոքր ավելի գնով:
ՌԴ նախագահը նաև հիշեցրել է, որ Հայաստանում ռուսական կապիտալ ներդրումների բաժինը գերազանցում է 86%-ը: Անդրադառնալով եվրոպացի գործընկերների կողմից խոստացված 2,5 միլիարդ եվրոյի ներդրումներին՝ նա ընդգծել է, որ դեռևս պարզ չէ, թե ինչպես և երբ են դրանք իրականացվելու:
Ելնելով ստեղծված իրավիճակից՝ Վլադիմիր Պուտինը կոչ է արել հնարավորինս շուտ հանրաքվե անցկացնել և վերջնական ընտրություն կատարել Եվրամիությանն անդամակցելու կամ Եվրասիական տնտեսական միության կազմում մնալու միջև։
Նա հավելել է, որ ԵՄ-ին մերձենալու ուղղությամբ Երևանի կայացրած ցանկացած տնտեսական որոշում չի վնասի Ռուսաստանի հետ հումանիտար կապերին։