Մադրիդի «Ատլետիկոյի» ղեկավարությունը դիտարկում է առաջիկա ամռանը թիմի արգենտինացի հարձակվող Խուլիան Ալվարեսի վաճառքի հնարավորությունը, որպեսզի անհաջող մրցաշրջանից հետո ֆինանսավորի կազմի թարմացումը։ Այս մասին հայտնում է իսպանական AS պարբերականը։
Աղբյուրի տվյալներով՝ ակումբի սպորտային տնօրեն Մատեու Ալեմանին արդեն սկսել է նախապատրաստվել «Ատլետիկոյի» նորագույն պատմության ամենախոշոր տրանսֆերային արշավներից մեկին։ Թիմը Լա Լիգայի մրցաշրջանը եզրափակել է չորրորդ տեղում և դուրս մնացել Չեմպիոնների լիգայի կիսաեզրափակիչ փուլից, իսկ վերջնակետը դարձել է «Վիլյառեալից» կրած պարտությունը՝ 1-5 հաշվով։
Ալվարեսը, որը 2024 թվականին ակումբ էր տեղափոխվել 75 միլիոն եվրոյի դիմաց, ի սկզբանե համարվում էր նոր նախագծի առանցքային դեմքը։ Արգենտինացին անցկացրած 106 հանդիպումներում խփել է 49 գոլ, սակայն մադրիդյան թիմի հետ դեռևս ոչ մի տիտղոս չի նվաճել։
Հարձակվողի ծառայություններով ակտիվորեն հետաքրքրված են ֆրանսիական ՊՍԺ-ն, Լոնդոնի «Արսենալը», ինչպես նաև կատալոնական «Բարսելոնան», որն արդեն հասցրել է բանակցություններ վարել տրանսֆերի շուրջ։ Նշվում է, որ Մադրիդում ցանկանում են արգենտինացու վաճառքից ստանալ առնվազն 100 միլիոն եվրո։
Ակնկալվում է, որ ստացված միջոցներն ակումբը կուղղի «Մանչեսթեր Սիթիից» հեռացող կիսապաշտպան Բերնարդու Սիլվայի, ինչպես նաև Լոնդոնի «Տոտենհեմի» պաշտպան Կրիստիան Ռոմերոյի ձեռքբերմանը։