ԱՄՆ-ի հետ բանակցությունների ընթացքում Թեհրանը միջնորդների միջոցով փոխանցել է, որ երկու երկրների միջև համաձայնության չի հասնի առանց Իրանի սառեցված ակտիվների որոշակի մասի նախնական ազատման, հաղորդում է Tasnim լրատվական գործակալությունը՝ հղում անելով հարցին ծանոթ աղբյուրին։
Աղբյուրի փոխանցմամբ՝ Իրանը հստակեցրել է, որ որևէ համաձայնության չի հասնի առանց իր սառեցված ակտիվների որոշակի մասի նախնական ազատման և հետագայում բոլոր սառեցված ակտիվների ազատումը երաշխավորելու հստակ մեխանիզմի։
Աղբյուրը նշել է, որ այս հարցը ներկայացվել է պակիստանցի միջնորդին և բանակցություններին մասնակցող մի շարք տարածաշրջանային երկրների։
Աղբյուրը ընդգծել է, որ ամերիկացիները ներկայումս շարունակում են խոչընդոտել համաձայնագրի որոշակի կետերի իրականացմանը, այդ թվում՝ Իրանի սառեցված ակտիվների ազատմանը։
Ավելի վաղը Axios-ը հայտնել էր, որ ԱՄՆ-ն ու Իրանը մոտ են 60-օրյա հրադադարի համաձայնագիր կնքելուն։
ԱՄՆ-ն և Իսրայելն սկսել էին հարվածներ հասցնել Իրանին փետրվարի 28-ին, ապրիլի 8-ին ԱՄՆ-ն և Իրանը համաձայնության էին եկել երկշաբաթյա հրադադարի շուրջ: Իսլամաբադում կայացած բանակցությունների առաջին փուլն ավարտվել էր անարդյունք։
Մայիսի 19-ին ԱՄՆ նախագահ Դոնալդ Թրամփը հայտարարել էր, որ Միացյալ Նահանգները պատրաստ է հնարավորություն տալ դիվանագիտությանը մինչև հաջորդ շաբաթվա սկիզբ՝ հետաձգելով ռազմական գործողությունների հնարավոր վերսկսումը:
