Հըզպալլայի ընդհանուր քարտուղար շէյխ Նայիմ Քասեմ Դիմադրութեան եւ ազատագրութեան տօնին առիթով յղեց ուղերձ մը, որուն մէջ յայտնեց. «Զինաթափումը Լիբանանի պաշտպանական կարողութեան խլում է` ճամբան հարթելով բնաջնջումին, եւ ատիկա չենք կրնար ընդունիլ: Զէնքը մեր ձեռքը պիտի մնայ, մինչեւ որ լիբանանեան պետութիւնը կարենայ իր պարտականութիւնը կատարել, եւ ամէն ոք, որ մեր դէմ կը կանգնի, անոր դէմ պիտի կանգնինք, ինչպէս Իսրայէլի դէմ կը կանգնինք»:
«Եթէ կառավարութիւնը անկարող է գերիշխանութիւնը ապահովել, թող հեռանայ: Ուղղակի բանակցութիւնները մերժելի են եւ անոնք Իսրայէլի համար զուտ շահ են», նշեց շէյխ Քասեմ:
«Տուները պիտի վերաշինենք, եւ մեր ժողովուրդը իր բնակավայրերը պիտի վերադառնայ: Թշնամին պարտուած դուրս պիտի գայ, եւ մօտ օրէն երրորդ ազատագրումը պիտի յայտարարենք», ըսաւ ան:
«Ժողովուրդը իրաւունք ունի մեր հաստատութիւնները թիրախաւորող ամերիկեան-իսրայէլեան ծրագիրին դէմ փողոց դուրս գալու եւ կառավարութիւնը տապալելու», յայտնեց Հըզպալլայի ընդհանուր քարտուղարը:
«Կը մաղթենք, որ թշնամական արարքներու ամբողջական դադրեցման համաձայնութիւն գոյանայ, եւ այդ համաձայնութիւնը մեզ ալ ներառէ», նշեց շէյխ Քասեմ: