Մայիսի 22-ի առավոտյան ուժայինները ժամանել են «Մայր Հայաստան» դաշինքի անդամ Անդրանիկ Թևանյանի տուն՝ խորհրդարանի փակ նիստի տեղեկությունները հրապարակելու վերաբերյալ նրան առաջադրված մեղադրանքներից հետո։ Թևանյանի տանից տեսանյութը հրապարակել է «Մայր Հայաստան» ժողովրդական շարժման ներկայացուցիչը։
Կադրերում երևում են սենյակում գտնվող իրավապահ մարմինների մի քանի աշխատակիցներ։ Շարժման ներկայացուցիչը հայտարարել է, որ ուժայինները եկել են քննչական գործողություններ իրականացնելու համար։ Նա պահանջել է ներկայացնել քննչական գործողության մեկնարկի մասին փաստաթղթերը և հրաժարվել է դադարեցնել նկարահանումը մինչև դրանց ներկայացումը և փաստաբանի ժամանումը։
«Ես չեմ անջատելու հեռախոսը, քանի դեռ դուք չեք ներկայացրել քննչական գործողություն իրականացնելու մասին ծանուցումը։ Ես կշարունակեմ նկարահանել մինչև փաստաբանի գալը»,- տեսանյութում ասում է կինը։
Դատելով կադրերից՝ նկարահանման պահին տանը գտնվել է նաև ինքը՝ Թևանյանը։
Իրականացվող գործողությունների բնույթի վերաբերյալ իրավապահ մարմինների պաշտոնական մեկնաբանություններ հրապարակման պահին դեռևս չեն ստացվել։
Քննչական կոմիտեն մայիսի 21-ին հայտնել էր Անդրանիկ Թևանյանի նկատմամբ պետական դավաճանության և լրտեսության փաստով քրեական վարույթ նախաձեռնելու մասին՝ խորհրդարանի փակ նիստի տվյալների հնարավոր հրապարակման պատճառով։ Թևանյանն անհեթեթ էր անվանել իրեն առաջադրված մեղադրանքները՝ ընդգծելով, որ 2024 թվականին ինքը ֆիզիկապես չէր կարող Ազգային ժողովում լինել կամ որևէ մեկին փակ լսումներից տեղեկություններ փոխանցել, քանի որ դեռևս 2023 թվականին վայր է դրել պատգամավորական մանդատը՝ Երևանի ավագանու ընտրություններին մասնակցելու նպատակով։
