Հայկական կողմը Ռուսաստան ծաղիկների ներկրման սահմանափակումներ մտցնելու վերաբերյալ պաշտոնական որոշում չի ստացել, հայտարարել է ՀՀ էկոնոմիկայի նախարար Գևորգ Պապոյանը՝ մեկնաբանելով մայիսի 22-ից հնարավոր սահմանափակումների մասին «Ռոսսելխոզնադզորի» հայտարարությունը։ Նախարարի ելույթը հեռարձակել է Armenia Today-ի յություբյան ալիքը։
Պապոյանը հայտնել է, որ «Ռոսսելխոզնադզորի» մասնագետներն ստուգումներ են իրականացնում Հայաստանի ընկերություններում և ծաղկի ջերմատներում՝ չհստակեցնելով, թե հատկապես ո՞ր կազմակերպությունների մասին է խոսքը։
«Պաշտոնական դիմում չենք ստացել, դրա համար այդ մասով չեմ կարող մեկնաբանել։ Գիտեմ, որ «Ռոսսելխոզնադզորի» մասնագետները գտնվում են Հայաստանում և ստուգումներ են իրականացնում կոնկրետ ընկերություններում։ Դրական արդյունքի դեպքում նրանց համար արտահանումը կվերականգնվի»,- ասել է նա կառավարության նիստից հետո կայացած ճեպազրույցում։
Նախարարը վստահեցրել է, որ իրավիճակն, ընդհանուր առմամբ, «կառավարելի է, և ռուս գործընկերների հետ աշխատանք է տարվում» այն կարգավորելու ուղղությամբ։
«Խոսքն աշխատանքային գործընթացների մասին է, և այդ ստուգումների արդյունքներով կընդունվեն համապատասխան որոշումներ, թե որ ընկերությունները կշարունակեն արտահանումը, իսկ որ դեպքերում լրացուցիչ աշխատանքի կարիք կլինի։ Եվ եթե լինի դրական եզրակացություն, նրանց համար արտահանման հնարավորություն կբացվի»,- նշել է նախարարը։
Պապոյանը հավելել է, որ մի շարք դեպքերում արտահանման սահմանափակումներն արդեն իսկ հանվել են ընթացակարգերն անցնելուց հետո։
«Մենք լուծում ենք այդ խնդիրները, ինչպես, օրինակ, ռուսական Ozon և Wildberries մարկետփլեյսերի դեպքում։ Այդ հարցն արդեն զգալի չափով լուծված է»,- ասել է նա։
Պապոյանը չի բացառել, որ Հայաստանում առանձին անձինք փորձում են խնդիրներ ստեղծել հայ արտադրողների համար ռուսական շուկայում՝ չհստակեցնելով, թե ում նկատի ունի։
«Ես չեմ բացառում, որ Հայաստանում կան որոշակի ուժեր, որոնք փորձում են ստեղծել իրավիճակ, որպեսզի հայ արտադրողները խնդիրների բախվեն Ռուսաստանում։ Մենք պարբերաբար ստանում ենք նման տեղեկատվություն, բայց այդ հարցերը լուծելի են»,- նշել է նա։
Միևնույն ժամանակ, նախարարը հայտնել է գերատեսչության աշխատանքի մասին՝ ուղղված արտահանման ուղղությունների դիվերսիֆիկացմանը՝ զուգահեռաբար զարգացնելով Հայաստանում ծաղկաբուծության ոլորտը, որի ձեռնարկությունները, ըստ նրա պնդման, համապատասխանում են ԵԱՏՄ լավագույն չափանիշներին և գրեթե չունեն նմանը Միության տարածքում։
Պապոյանը վստահություն է հայտնել, որ Հայաստանում նոր տեխնոլոգիաների կիրառմամբ ջերմատնային տնտեսությունների զարգացումը հնարավորություն է տալիս դուրս գալ նոր շուկաներ և արտադրանքն արտահանել Եվրոպական միության շուկա ու Միացյալ Նահանգներ։
Նա հավելել է, որ 2026 թվականի հունվար-ապրիլ ամիսներին Հայաստանից դեպի Չինաստան և Եվրոպական միության երկրներ ծաղիկների արտահանումը կրկնապատկվել է, և արտադրանքի մի մասն արդեն դիտարկվում է եվրոպական շուկաներ դուրս գալու համար։
«Քննարկում ենք վարդերի՝ դեպի ԵՄ շուկա արտահանման աջակցության մեխանիզմները (տրանսպորտային ծախսերի փոխհատուցումից մինչև սորտերի հեղինակային վճարների պաշտպանություն), քանի որ որակի մասով մեր արտադրանքն արդեն ապահովում է հոլանդական վարդերի մակարդակը, որոնք վաճառվում են Նիդերլանդների հայտնի աուկցիոններում»,- կարծում է նա։
«Ռոսսելխոզնադզորը» մայիսի 20-ին հայտնել էր, որ մայիսի 22-ից ժամանակավոր սահմանափակումներ է մտցնում Հայաստանից ծաղիկների ներկրման նկատմամբ՝ մինչև ջերմատնային տնտեսությունների տեսչական ստուգումների ավարտը և դրանց արդյունքների վերլուծությունը։ 2025 թվականի հունիսին «Ռոսսելխոզնադզորը» հայտնել էր, որ Հայաստանից ներմուծված ծաղիկներում ավելի ու ավելի հաճախ են հայտնաբերվում «ԵԱՏՄ երկրների համար վտանգավոր» և կարանտինային վերահսկողության ենթակա ապրանքներ: Գերատեսչությունը նամակ էր ուղարկել Հայաստանի կարգավորող մարմիններին՝ կոչ անելով ուժեղացնել վերահսկողությունը: Հունիսի 16-ին Ռուսաստանը և Հայաստանը բանակցություններ էին վարել աճող խախտումների վերաբերյալ, իսկ հուլիսին ծաղկավաճառները բողոքի ակցիա էին անցկացրել ՀՀ կառավարության շենքի դիմաց՝ վկայակոչելով արտահանման հետ կապված խնդիրները։
