Օրենքների նախագծերի փաթեթի ընդունմամբ նախատեսվում է բարձրացնել գնումների արդյունավետությունը, թափանցիկությունն ու հաշվետվողականությունը, խթանել մրցակցային միջավայրը եւ ապահովել նոր մեխանիզմների փորձարկման հնարավորություն:
ՀՀ ԱԺ տնտեսական հարցերի մշտական հանձնաժողովի՝ մայիսի 20-ի նիստում առաջին ընթերցմամբ քննարկվել է ««Գնումների մասին» օրենքում փոփոխություններ եւ լրացումներ կատարելու մասին» եւ ««Հայաստանի Հանրապետության բյուջետային համակարգի մասին» օրենքում լրացումներ կատարելու մասին» օրենքների նախագծերի փաթեթը:
ՀՀ ֆինանսների նախարարի տեղակալ Ավագ Ավանեսյանը մանրամասն ներկայացրել է առաջարկվող փոփոխությունները: Մասնավորապես՝ տրվել են դրամաշնորհի, շրջանակային համաձայնագրի, հանրային հսկողության, արհեստական բանականության հստակ սահմանումները: Սահմանվել են մրցակցային ընթացակարգը, նախաորակավորման, որակավորման եւ որակի չափանիշների գնահատումը: Գնման առարկայի ֆունկցիոնալ բնութագրմանը տրվել է ավելի ճկուն ձեւակերպում: Հստակեցվել են ապրանքային նշանների հղումների կիրառման դեպքերը: Սահմանվել են նաեւ նոր՝ մեկ անձից գնում իրականացնելու պայմանները:
Առաջարկվող կարգավորումները նպատակ ունեն բարելավել եւ արդիականացնել գնումների գործընթացները՝ ապահովելով բավարար արդյունավետություն, թափանցիկություն, հաշվետվողականություն եւ մրցակցային միջավայր:
Ավագ Ավանեսյանը պատասխանել է պատգամավորների հարցերին՝ ներկայացնելով պարզաբանումներ առաջարկվող փոփոխությունների, լրացումների վերաբերյալ: Նա տեղեկացրել է, որ առաջարկվող կարգավորումները քննարկվել են շահառու տնտեսավարողների լայն շրջանակի եւ հասարակական կազմակերպությունների ներկայացուցիչների հետ:
Օրենքի նախագիծը ստացել է դրական եզրակացություն: