ԱԺ տնտեսական հարցերի մշտական հանձնաժողովը մայիսի 20-ին առաջին ընթերցմամբ քննարկել է ««Հավատարմագրման մասին» օրենքում փոփոխություններ եւ լրացումներ կատարելու մասին» օրենքի նախագիծը:
ՀՀ էկոնոմիկայի նախարարի տեղակալ Նարեկ Հովակիմյանի տեղեկացմամբ փոփոխության եւ լրացման անհրաժեշտությունը պայմանավորված է Հավատարմագրման ազգային մարմնի որոշակի գործառույթներում նախատեսվող փոփոխություններով: Նախագծով առաջարկվում է կատարել մի շարք փոփոխություններ եւ լրացումներ՝ նպատակ ունենալով արդիականացնել եւ կատարելագործել հավատարմագրման ոլորտի կարգավորումները, ապահովել դրա համապատասխանությունը միջազգային լավագույն փորձին եւ ընթացիկ կարիքներին: Ակնկալվում է, որ նախագծի ընդունման արդյուքում կբարելավվի հավատարմագրման ոլորտի կարգավորման հստակությունն ու կիրառելիությունը, կներդրվեն նոր հասկացություններ եւ մեխանիզմներ, օրինակ՝ համապատասխանության գնահատման սխեմա, տեխնիկական գնահատող: Կսահմանվեն հստակ ընթացակարգեր բողոքարկման, գնահատման, ռեեստրների վարման համար: Կսահմանվեն նաեւ ընթացակարգեր համապատասխանության գնահատման սխեմաների մասնագիտական վերլուծության համար, կավելանան հավատարմագրման դադարեցման հիմքերը:
Նախագիծն արժանացել է հանձնաժողովի հավանությանը, այն նախատեսվում է քննարկել Ազգային ժողովի՝ մայիսի 26-ին մեկնարկող հերթական նիստերի ընթացքում: