Անցած ժամվա լուրերը՝ հակիրճ և բովանդակային.
• Նիկոլ Փաշինյանը հայտարարել է, որ «Արարատի ցեմենտ» գործարանը կդառնա պետական սեփականություն՝ նշելով, որ դատախազությունից արդեն ստացվել է համապատասխան գրություն։ Նրա խոսքով՝ գործարանում շուտով կառավարիչ կնշանակվի, իսկ աշխատակիցներն այլևս պարտավոր չեն կատարել նախկին ղեկավարության հրահանգները։
• Վարչապետ Նիկոլ Փաշինյանը քարոզարշավի ընթացքում կրկին անդրադարձել է Սամվել Կարապետյանի վերաբերյալ միջազգային մամուլի հրապարակումներին՝ ակնարկելով արտաքին ազդեցությունների և քաղաքական կապերի թեման։
• Փաշինյանը հայտարարել է, որ Ռոբերտ Քոչարյանի հրապարակված ձայնագրությունը իրական է և անձամբ որպես վարչապետ երաշխավորում է դրա իսկությունը։ Նրա խոսքով՝ նախկինում այդ ձայնագրությունը փորձել են ներկայացնել որպես արհեստական բանականությամբ ստեղծված նյութ։
• «Ուժեղ Հայաստան» կուսակցության մամուլի խոսնակ Մարիաննա Ղահրամանյանը հայտարարել է, որ այսօրվանից դատական հայցեր են ներկայացվելու այն ՔՊ-ականների դեմ, որոնք տարածել են ապատեղեկատվություն Սամվել և Նարեկ Կարապետյանների վերաբերյալ։ Նա նշել է, որ հնարավոր փոխհատուցումները կուղղվեն Սևանի հոգեկան առողջության կենտրոնին։
• Հակակոռուպցիոն կոմիտեն հայտնել է, որ ընտրակաշառքի, ընտրողների բնակարանների վարձավճարների վճարման և ընտրական իրավունքի ազատ իրականացմանը խոչընդոտելու գործով ձերբակալված 4 անձանց նկատմամբ կալանք է կիրառվել։ Գործը կապվում է «Ուժեղ Հայաստան» կուսակցության թեկնածուներից մեկի գործունեության հետ։
• Հայաստանը և Ադրբեջանը համաձայնեցրել են սահմանազատման աշխատանքների իրականացման երեք ուղեցույցների նախագծերը, որոնք այժմ ներկայացվել են կառավարությունների հաստատմանը։ Նախագծերը արդեն տեղադրվել են հանրային քննարկման հարթակում։
• Ուկրաինական անօդաչու թռչող սարքերը հարվածել են Ստավրոպոլի երկրամասի Նևինոմիսկ քաղաքի արդյունաբերական գոտուն։ Տեղի իշխանությունների տվյալներով՝ տարածքում հրդեհ է բռնկվել։
• Թուրքիայի Մալաթիա քաղաքում տեղի է ունեցել 5,6 մագնիտուդ ուժգնությամբ երկրաշարժ։ Այս պահի դրությամբ զոհերի կամ ավերածությունների մասին պաշտոնական տեղեկություններ չեն հաղորդվել։
• Կրեմլի խոսնակ Դմիտրի Պեսկովը հայտարարել է, որ ուկրաինական հակամարտության խաղաղ կարգավորման գլխավոր խոչընդոտը Վլադիմիր Զելենսկին և նրա վարչակարգն են։ Նրա խոսքով՝ դա հերթական անգամ ապացուցում է, թե ով է խանգարում խաղաղ գործընթացին։