Իշխանությունները հրահանգել են իրավապահ համակարգին ընդդիմադիրների համատարած ձեռբակալություններ իրականացնել, գրել է «Հրապարակ» օրաթերթը՝ հղում անելով իրավապահ աղբյուրներին։
Պատճառն, ըստ թերթի, նախընտրական հարցումների տվյալներն են, որոնք վկայում են «Քաղաքացիական պայմանագրի» իջնող վարկանիշի մասին։
Ըստ պարբերականի՝ ձերբակալությունների պատրվակ է դիտարկվում «դիմակավորված արցախցիների» տեսանյութը, որն օգտագործվում է իշխանությունների կողմից ընդդիմադիրների նկատմամբ հնարավոր հետապնդումների ալիք սկսելու համար։
Համացանցում մայիսի 18-ին տարածված տեսանյութում մի խումբ դիմակավորված անձինք Արցախի բարբառով մեղադրանքներ էին հնչեցրել վարչապետ Նիկոլ Փաշինյանի հասցեին՝ վերջինիս պատասխանատու համարելով Արցախի կորստի և Հայաստանի անվտանգային խնդիրների համար։ Բացի այդ, նրանք նշել էին, որ իրենք տեղեկացված են վարչապետի տեղաշարժերի մասին, պատրաստվում են գտնել և հաշվեհարդար տեսնել նրա նկատմամբ։
Փաշինյանը, անդրադառնալով այս տեսանյութին, հայտարարել էր, որ բոլորի «մասկեքը հանելու է ու չոքացնելու»։
