Ըստ Վրաստանի ֆինանսների նախարարության 2026 թվականի ապրիլի տվյալների՝ երկրի պետական արտաքին պարտքը տարեկան կտրվածքով աճել է 183 միլիոն դոլարով՝ հասնելով 9,2 միլիարդ դոլարի: Աճի հիմնական պատճառը ենթակառուցվածքային խոշոր նախագծերի, մասնավորապես՝ ճանապարհների և թունելների շինարարության համար ներգրավված նոր վարկերն են:
Վրաստանի խոշորագույն վարկատուների հնգյակն ունի հետևյալ տեսքը.
- Ասիական զարգացման բանկ (ԱԶԲ)՝ ավելի քան 2,5 մլրդ դոլար,
- Համաշխարհային բանկ՝ շուրջ 2,3 մլրդ դոլար,
- Եվրոպական ներդրումային բանկ՝ 1,2 մլրդ դոլար,
- Ֆրանսիա (AFD)՝ 858 մլն դոլար,
- Գերմանիա՝ շուրջ 600 մլն դոլար:
Երկրի պարտքի մի մասը բաժին է ընկնում եվրոպարտատոմսերին (500 մլն դոլար) և Արժույթի միջազգային հիմնադրամին (շուրջ 452 մլն դոլար): Չնայած իշխանությունները պնդում են, որ միջոցներն ուղղվում են տնտեսական աճը խթանող տարանցիկ միջանցքների զարգացմանը, տնտեսագետները նախազգուշացնում են, որ արտարժույթով ներգրավված պարտքը մեծացնում է կախվածությունը լարիի փոխարժեքի տատանումներից: