Ռուսաստանի արտաքին գործերի նախարար Սերգեյ Լավրովը հայտարարել է, որ Միացյալ Նահանգները փորձում է հաստատել իր համաշխարհային գերիշխանությունը՝ երկրներին ստիպելով հրաժարվել ռուսական էներգակիրներից և անցնել ամերիկյան թանկարժեք պաշարների գնմանը։
Ինչպես հաղորդում է RT India հեռուստաալիքը, Ռուսաստանի գլխավոր դիվանագետը Վաշինգտոնի այս քաղաքականությունը որակել է որպես «անազնիվ մեթոդների» կիրառում, որոնք իրենց բնույթով գաղութատիրական և նորգաղութատիրական են։ Լավրովի պնդմամբ՝ ԱՄՆ-ն օգտագործում է շահագործման մեխանիզմներ՝ միջազգային շուկան սեփական կանոններին ենթարկեցնելու համար։
Նախարարն ընդգծել է, որ Վաշինգտոնի վարած քաղաքականության հիմնական նպատակն է ստիպել պետություններին գնել ամերիկյան հեղուկացված բնական գազն ու նավթը՝ ռուսական առավել մատչելի տարբերակների փոխարեն։ Ըստ Սերգեյ Լավրովի՝ համաշխարհային էներգետիկ համակարգի նկատմամբ վերահսկողություն սահմանելը ԱՄՆ-ի համար գործիք է՝ աշխարհը կառավարելու և սեփական տնտեսական շահերն առաջ մղելու համար, ինչը լրջորեն վնասում է միջազգային ազատ առևտրի սկզբունքներին։