Հեռախոսազրույց է տեղի ունեցել Ադրբեջանի և Իրանի արտաքին գործերի նախարարներ Ջեյհուն Բայրամովի և Սեյեդ Աբբաս Արաղչիի միջև։
Ըստ Ադրբեջանի արտաքին գործերի նախարարության հայտարարության՝ զրույցը կենտրոնացել է Ադրբեջանի և Իրանի միջև երկկողմ հարաբերությունների, տարածաշրջանում ստեղծված իրավիճակի և ընթացող բանակցությունների, ինչպես նաև Իրանի շուրջ ստեղծված իրավիճակի դիվանագիտական և քաղաքական կարգավորման հեռանկարների վրա։
Նախարար Աբբաս Արաղչին մանրամասն տեղեկատվություն է տրամադրել բանակցությունների վերաբերյալ։
Նախարար Ջեյհուն Բայրամովը ընդգծել է Ադրբեջանի աջակցությունը հակամարտությունը խաղաղ և բանակցությունների միջոցով լուծելու ջանքերին։
Բացի տարածաշրջանային անվտանգության խնդիրներից, նախարարներն անդրադարձել են նաև դիվանագիտական հարթությունում իրականացվող քայլերին և երկու երկրների միջև փոխգործակցության հետագա զարգացմանը։ Ըստ իրանական կողմի տարածած հաղորդագրության՝ այս զրույցը տեղի է ունեցել տարածաշրջանում ակտիվ դիվանագիտական զարգացումների համատեքստում՝ նպատակ ունենալով համակարգել դիրքորոշումները երկկողմ հետաքրքրություն ներկայացնող հարցերի շուրջ: