13 մայիսի 2026 – 12:37 AMT
PanARMENIAN.Net – Ընտրակաշառքի վերաբերյալ 19 հաղորդում փոխանցվել է ՀՀ հակակոռուպցիոն կոմիտե, հայտնում է ներքին գործերի նախարարությունը։
Տվյալները ներկայացվել են գերատեսչության ղեկավար Արփինե Սարգսյանի գլխավորությամբ մայիսի 12-ին անցկացված աշխատանքային խորհրդակցության ժամանակ: Սարգսյանին է ներկայացվել ԱԺ առաջիկա ընտրություններին ընդառաջ ոստիկանության ստորաբաժանումների կողմից իրականացված աշխատանքը:
Նախարարը նախընտրական և ընտրական գործընթացների ընթացքում առերևույթ իրավախախտումների և հանցագործությունների կանխարգելման, դրանց բացահայտման և արագ արձագանքման ուղղությամբ տվել է խիստ հանձնարարականներ։
Սարգսյանը շեշտել է, որ իրավապահ համակարգի արձագանքը պետք է լինի օպերատիվ, պրոֆեսիոնալ և համակարգված՝ ընտրական գործընթացների պատշաճ կազմակերպումն ապահովելու նպատակով։
Մայիսի 8-ին մեկնարկած նախընտրական քարոզարշավը կշարունակվի մինչև հունիսի 5-ը։ Հունիսի 6-ը կլինի լռության օր, իսկ հունիսի 7-ին կանցկացվեն ընտրությունները։