Պակիստանը հերքել է CBS News-ի «մոլորեցնող և կեղծ» լուրը, թե իրանական ինքնաթիռներ են տեղակայվել երկրում՝ իրենց անվտանգությունն ապահովելու համար. հայտարարել է Պակիստանի արտաքին գործերի նախարարությունը։
Ավելի վաղ CBS News-ը, հղում անելով աղբյուրներին, հաղորդել էր, որ Իրանը, հնարավոր է, ռազմական և քաղաքացիական ինքնաթիռներ է տեղակայել Պակիստանում և Աֆղանստանում՝ դրանք ԱՄՆ-ի հնարավոր հարվածներից պաշտպանելու համար: Հաղորդման համաձայն՝ Իսլամական Հանրապետության ռազմական ինքնաթիռները տեղակայված էին, մասնավորապես, Պակիստանի Նուր Խան ռազմաօդային բազայում, որը գտնվում է Իսլամաբադից հարավ: Հեռուստաալիքի աղբյուրները նշել են, որ այնտեղ տեղակայվել է նաև իրանական RC-130՝ հետախուզական առաքելությունների համար նախատեսված C-130 ռազմական տրանսպորտային ինքնաթիռ:
«Նման ենթադրական պնդումները կարծես թե ուղղված են տարածաշրջանային կայունության և խաղաղության ապահովմանն ուղղված շարունակական ջանքերը խաթարելուն», – ասվում է նախարարության սոցիալական ցանցերում հրապարակված գրառման մեջ:
Արտաքին գործերի նախարարությունը պարզաբանել է, որ հրադադարի հաստատումից հետո և Իսլամաբադում ԱՄՆ-Իրան բանակցությունների առաջին փուլի ընթացքում երկու երկրներից մի շարք ինքնաթիռներ ժամանել են Պակիստան՝ «ապահովելու բանակցային գործընթացին առնչվող դիվանագիտական անձնակազմի, անվտանգության խմբերի և վարչական անձնակազմի տեղաշարժը»: Այնուամենայնիվ, որոշ ինքնաթիռներ և օժանդակ անձնակազմ «ժամանակավորապես մնացել են Պակիստանում՝ սպասելով հետագա փոխգործակցության փուլերին»:
Հաղորդագրության համաձայն՝ Պակիստանում գտնվող իրանական ինքնաթիռները ժամանել են հրադադարի ընթացքում և «որևէ կապ չունեն որևէ ռազմական արտակարգ իրավիճակների մասին համաձայնագրի կամ անվտանգության պայմանավորվածության հետ»։
«Հակառակը պնդումները ենթադրական են, մոլորեցնող և լիովին կտրված իրական համատեքստից», – ընդգծել է Պակիստանի արտաքին գործերի նախարարությունը։