ԱՄՆ նախագահ Դոնալդ Թրամփը հայտարարել է, որ Իրանի հետ զինադադարը «մահամերձ վիճակում է» (on life support)։ Սա այն բանից հետո, երբ պատերազմն ավարտելու վերաբերյալ ԱՄՆ-ի առաջարկին Թեհրանի տված պատասխանը հստակ դարձրեց, որ կողմերը դեռևս խիստ տարբեր դիրքորոշումներ ունեն մի շարք հարցերի շուրջ:
Իրանը կոչ է արել դադարեցնել պատերազմը բոլոր ճակատներում, ներառյալ Լիբանանը, որտեղ ԱՄՆ դաշնակից Իսրայելը մարտեր է մղում Իրանի կողմից աջակցվող «Հեզբոլլահի» գրոհայինների դեմ: Թեհրանը նաև պահանջել է պատերազմի վնասների փոխհատուցում, ԱՄՆ ռազմածովային շրջափակման դադարեցում, հետագա հարձակումների բացառման երաշխիք և իրանական նավթի վաճառքի վերսկսում: Բացի այդ, Թեհրանն ընդգծել է իր ինքնիշխանությունը Հորմուզի նեղուցի նկատմամբ, որտեղ նա դադարեցրել է նավագնացությունը, որով սովորաբար տեղափոխվում է համաշխարհային նավթի և գազի պաշարների մեկ հինգերորդ մասը:
Թրամփն ասել է, որ Իրանի պատասխանը վտանգում է ապրիլի 7-ից գործող զինադադարի կարգավիճակը:
«Ես դա կանվանեի զինադադարի ամենաթույլ վիճակը հենց հիմա՝ կարդալով այն աղբը, որ նրանք մեզ ուղարկել են: Ես նույնիսկ մինչև վերջ չկարդացի այն»,- ասել է Թրամփը, ով բազմիցս սպառնացել է դադարեցնել զինադադարը:
ԱՄՆ-ն առաջարկել էր դադարեցնել մարտական գործողությունները նախքան ավելի վիճահարույց հարցերի, այդ թվում՝ Իրանի միջուկային ծրագրի շուրջ բանակցություններ սկսելը:
Երկուշաբթի օրը Թեհրանը պաշտպանել է իր դիրքորոշումը: «Մեր պահանջն օրինական է»,- հայտարարել է Արտաքին գործերի նախարարության մամուլի խոսնակ Էսմայիլ Բաղային: